स्पेनिस ला लिगा: मालोर्का र सेल्टा भिगोको बराबरी

एजेन्सी । म्याड्रिड , स्पेनिस ला लिगामा मालोर्का र सेल्टा भिगोले गोलरहित बराबरी खेल्दै अंक बाँडेका छन् । मालोर्काको घरेलु मैदानमा शुक्रबार राति भएको प्रतिस्पर्धात्मक खेलमा दुवै टोलीले गोल गर्ने राम्रा अवसर गुमाए ।

५२ प्रतिशत बल पोसेसन राखेको सेल्टा भिगोको गोल फर्काउने प्रयासमा मालोर्काको रक्षपंक्ति बाधक बन्यो । खेलभर सेल्भा भिगोले १४ र मालोर्काले १२ वटा पोस्ट् प्रहार गरेको थियो । सेल्टा भिगोका मिडफिल्डर ब्रेस मेन्डेज ‘म्यान अफ दी म्याच’ भए ।

बराबरीसँगै १७ खेलबाट २० अंक बनाएको मालोर्का १२औं स्थानमा छ । समान खेलबाट १७ अंक बनाएको सेल्टा भिगो १३औं स्थानमा छ । शीर्षस्थानमा रहेको रियल म्याड्रिडको १६ खेलबाट ३९ अंक पुगेको छ । दोस्रो स्थानमा रहेको सेभियाको ३१ र तेस्रो स्थानमा रहेको रियल बेटिसको ३० अंक छ ।

यसैबीच स्पेनिस ला लिगामा नोभेम्बर महिनाको ‘प्लेयर अफ दी मन्थ’ को उपाधि रियल म्याड्रिडका स्ट्राईकर भिनिसियस जुनियरले जितेका छन् । ला लिगाले भिनिसियसलाई उत्कृष्ट प्रदर्शनका आधारमा उक्त उपाधि दिने निर्णय गरेको हो । उनले गत महिना रायो भालेकानो, ग्रानाडा र सेभियाविरुद्ध उत्कृष्ट प्रदर्शन गरेका थिए । भिनिसियसले अगस्ट महिनाको ‘प्लेयर अफ दी मन्थ’ को उपाधि पनि जितेका थिए ।

ब्राजीलका २१ बर्षीय भिनिसियसले जारी ला लिगामा १० गोल गर्दै दुई असिस्ट पनि दिएका छन् । उनी ला लिगामा सर्वाधिक गोल गर्ने खेलाडीको दोस्रो स्थानमा छन् । शीर्षस्थानमा रहेका रियलकै कप्तान करिम बेन्जेमाले १२ गोल गरेका छन् ।

भिनिसियसलार्ई यस उपाधि आइतबार हुने म्याड्रिड डर्वीपछि प्रदान गरिनेछ । सिजनको पहिलो म्याड्रिड डर्वी आइतबार राति रियल म्याड्रिडको घरेलु मैदानमा हुनेछ ।

विश्वकै चर्चित लिग मध्यको एक स्पेनिस ला लिगा फुटबल पहिलो पटक नेपालमा डिशहोम एक्सन स्पोर्ट्स एचडी टेलिभिजन मार्फत प्रतक्ष हेर्न पाइने ब्यवस्था छ । हरेक हप्ता आउने ला लिगाको खेल अब हप्ताको ५० रुपैयाँ शुल्क तिरेर हेर्न सकिने छ ।

ला लिगाको नेपालका लागि पे टिभी तथा डिजिटलको विशेष प्रसारणको अधिकार डिशहोमले प्राप्त गरेको हो । ला लिगाका खेलहरु एक्सन स्पोर्टस एचडी २ मा प्रशारण भईरहेको छ ।

त्यसका लागि डिशहोमको ग्राहक भने बन्नुपर्ने हुन्छ । हाल डिशहोमको ग्राहकलाई ला लिगाको सिजन टिकट सिम टिभी, प्रभु टिभी र डिश होमको ओटीटी (डिशहोम गो) मार्फत उपलब्ध छ ।