समृद्ध श्रीलङ्का निर्माणका लागि नयाँ सुरुवात गर्न राष्ट्रपतिको आग्रह

एजेन्सी । राष्ट्रपति रनिल विक्रमासिङ्घेले समृद्ध श्रीलङ्का निर्माणका निम्ति नयाँ सुरुवात गर्न आह्वान गरेका छन् । सिंहला र तमिल नववर्षका अवसरमा जारी गरेको सन्देशमा उनले देशलाई वर्तमान चुनौतीबाट पार लगाउन नवीन सुरुवातका निम्ति आह्वान गरेका छन् ।

“गत वर्ष हाम्रो दैनिक जीवनमा बाधा पुर्याउने अभूतपूर्व आर्थिक सङ्कट झेल्नुपर्यो अहिले हामीले अथक कष्टबाट मुक्त भएर नयाँ वर्षको अनुष्ठानमा भाग लिन पाएका छौँ, सन् २०२३ ले श्रीलङ्काका लागि सन्तोषजनक वातावरण ल्याएको छ । अहिलेको तुलनामा देशलाई अझ समृद्ध बनाउने प्रयासमा हामी एकताबद्ध भएर अघि बढ्न जरुरी भएको छ,” सन्देशमा राष्ट्रपति विक्रमासिङ्घेले भनेका छन् ।

राजनीतिक सम्बद्धता, जातीय र धार्मिक विविधता भए पनि राष्ट्रको उज्ज्वल भविष्य निर्माणका निम्ति नयाँ सुरुवात अपरिहार्य भएकामा जोड दिँदै श्रीलङ्काली राष्ट्रपतिले एक राष्ट्रको रूपमा एकताबद्ध भएर अगाडि बढेमा समृद्धि प्राप्त गर्ने आकाङ्क्षा हासिल गर्न कठिन नहुने बताएका छन् ।