फुटपाथ अतिक्रमण हटाउन सुरु

काठमाडौँ । रुपन्देहीको सिद्धार्थनगर नगरपालिकाले फुटपाथ अतिक्रमण हटाउन थालेको छ । अतिक्रमणले नगर कुरूप देखिएको र सर्वसाधारणलाई हिँडडुल गर्न समस्या भएपछि नगरपालिकाको कार्यालयले हटाउन थालेको हो ।

यसका लागि नगरपालिकाले नगर प्रहरी परिचालन गरेको छ । पहिलो पटकका लागि नगर प्रहरीहरू दैनिक खटिएर सडक फुटपाथ अतिक्रमण नगर्न आग्रह गरिरहेका छन् ।

फुटपाथ अतिक्रमण गरेकाहरूलाई पहिलो पटकका लागि सचेत गराउँदै छौँ,’ सिद्धार्थनगर नगरपालिकाका नगर प्रहरी प्रमुख मनोज मल्ल भने, ‘अटेर गरेको अवस्थामा अतिक्रमण गरेर राखिएको सामग्री नियन्त्रणमा लिने गरेका छौँ ।’

विशेष गरी व्यवसायीहरूले बजार क्षेत्रको सडक र फुटपाथ अतिक्रमण गरेका छन् । अतिक्रमण गरेर राखिएको सामग्री नगर प्रहरीले नगरपालिकाको कार्यालय ल्याउने गरेका छन् । नगरपालिकाको कार्यालयमा आएको सामग्री व्यवसायीले लिन आएको खण्डमा व्यवसाय दर्ता, बहाल कर, व्यवसाय नवीकरण गरे÷नगरेको समेत पहिचान गर्ने गरिएको छ ।