मदन भण्डारी लोकमार्ग नजिकैको देउराली जङ्गलमा बम जस्ताे शंकास्पद वस्तु

काठमाडौँ । मदन भण्डारी लोकमार्ग अन्तर्गत चौदण्डीगढी नगरपालिका ३ बँदेलपानी र बेलका नगरपालिका ५ सुपाडे बीचमा पर्ने देउराली जङ्गलमा कार्टुनमा तार बाँधिएको अवस्थाको शंकास्पद बस्तु फेला परेको छ ।

नेत्रविक्रम चन्द (बिप्लब) नेतृत्वको नेकपा लगायत ४ राजनीतिक पार्टीहरूले गरेको संयुक्त नेपाल बन्दमा शंकास्पद बस्तु बम फेला परेको हो । मदन भण्डारी लोकमार्गमै शंकास्पद बस्तु फेला परेको जिल्ला प्रहरी कार्यालय उदयपुरका प्रहरी प्रमुख एसपी ज्ञानेन्द्र फुँयालले सडक छेउमा विद्युतको तार जोडिएको कार्टुन भेटिएको बस्तु के हो भन्ने बुझ्न र बम भए डिस्पोज गर्न नेपाली सेनाको डिस्पोजल टोली घट्ना स्थलतर्फ पठाइएको बताए ।

 सडक छेउमा शंकास्पद बस्तु भेटिएको जानकारी आए लगतै नेपाली सेनाको बोक्सेस्थित गणबाट बम डिस्पोजल टोलीले घट्नास्थल पठाएका बताए । शंकास्पद बस्तुमा बम वा अन्य विष्फोटक पदार्थ के हो यकिन गर्न टोली परिचालन गरिएको छ ।

बिप्लब नेतृत्वको नेकपाले ०७७ फागुन २१ गते तत्कालीन सरकारसँग गरेको ३ बुँदे सहमति कार्यान्वयन नगरेको, राष्ट्रघाति अमेरिकन परियोजना मिलेनियम च्यालेन्ज कर्पोरेसन (एमसीसी) पास गरेको तथा अमेरिकाकै स्टेट पार्टनरसिप प्रोग्राम (एसपिपि) लागू गर्न खोजेको भन्दै अन्य ३ राजनीतिक दलहरूसँगको सहकार्यमा मंगलबार नेपाल बन्दको आव्हान गरेको थियो ।