भारतमा टी–२० विश्वकप नखेल्ने बंगलादेशको अडानमा पाकिस्तानको समर्थन

काठमाडौँ । पाकिस्तान क्रिकेट बोर्ड (पीसीबी) ले भारतमा टी–२० विश्वकप नखेल्ने बंगलादेशको चाहनालाई समर्थन गरेको छ । पीसीबीले आईसीसीलाई पत्र लेख्दै बंगलादेशलाई आफ्नो समर्थन व्यक्त गरेको बताइएको छ ।

क्षेत्रीय राजनीतिक अवस्थालाई उद्धृत गर्दै पीसीबीले बंगलादेश टोलीले यस समयमा भारतमा नखेल्ने निर्णय जायज रहेको बताएको छ । यस पत्रको प्रतिलिपि आईसीसी बोर्ड सदस्यहरूलाई पनि पठाइएको छ । सुरक्षा कारणले गर्दा बंगलादेश क्रिकेट बोर्ड (बीसीबी) श्रीलंकामा खेल तालिका मिलाउन आइसीसीलाई आग्रह गरेको छ तर आइसीसीले असम्भव भएको भन्दै आजसम्म अन्तिम निर्णय लिन अल्टिमेटम दिएको छ ।

श्रीलंका र भारत संयुक्त आयोजक भए पनि, आईसीसीले बंगलादेशलाई श्रीलंकामा खेल्न अनुमति दिएको छैन । गत हप्ता बीसीबीसँगको बैठकमा पनि यसले यो अडान स्पष्ट पारेको थियो । बंगलादेशका टी–२० कप्तान लिटन दासले २०२६ को टी–२० विश्वकपमा बंगलादेशको सहभागिताको बारेमा अनिश्चितता स्वीकार गरेका छन् । उनले यो अनिश्चितता आईसीसीले स्थलको बारेमा अझै अन्तिम निर्णय नगरेको कारण उत्पन्न भएको बताएका छन् ।

भारतीय क्रिकेट नियन्त्रण बोर्डले बंगलादेशी क्रिकेटर मुस्ताफिजुर रहमानलाई आईपीएलको कोलकाता नाइट राइडर्स टोलीबाट हटाउने आदेश दिएपछि यो विवाद उत्पन्न भएको थियो ।