मौलिक धर्म, परम्पराको सम्मान र जगेर्नाबाट नै देश र समाज सुढृद बन्छ : पूर्वमन्त्री सुब्बा

सुनसरी, १२ भदौ । राष्ट्रिय प्रजातन्त्र पार्टी (राप्रपा) का नेता, पूर्वमन्त्री रामकुमार सुब्बाले मौलिक धर्म, परम्पराको सम्मान र जगेर्नाबाट नै देश र समाज सुढृद हुने बताएका छन् ।

‘आदिवासी धर्म, सँस्कृतिको आफ्नै भूमिका र देन छ । यसै अनुरुप मौलिक लिम्बु परम्परालाई निरन्तर राख्नु महत्वपूर्ण हुन्छ,’ पूर्वमन्त्री सुब्बाले शनिबार भने । स्वर्गीय क्या. इन्द्रबहादुर लिम्बुको चार दिनको सुद्ध्याई कार्यक्रममा पूर्वमन्त्री सुब्बाले यस्तो विचार व्यक्त गरेका हुन् ।

इटहरी नगरपालिका–१० का स्थानीय, लिम्बुको १०२ वर्षीको उमेरमा निधन भएको थियो । अवकाशप्राप्त बेलयाती सेनाका क्याप्टेन लिम्बुका ६ वटी श्रीमतीमध्ये ४ वटी जीवित छन् । उपस्थित सबै परिवारजनलाई सात्वना दिँदै राप्रपाका वरिष्ठ नेता सुब्बाले मृत आत्माप्रति श्रद्धाञ्जली अर्पण गरे ।

‘दोस्रो विश्व युद्धका सेनानी, क्या. इन्द्रबहादुर लिम्बु समाजको गहना हुनुहुन्थ्यो । समाजसेवीका रुपमा परिचित क्याप्टेन लिम्बुले देश भित्र र बाहिर निर्वाह गर्नुभएको भूमिका अतुलनीय छ,’ सुब्बाले भने ।