पुष्प व्यवसायको भविष्य उज्ज्वल, सरकारी सहयोगको आवश्यकता (भिडिओ)

काठमाडौं । ललितपुरको जावलाखेल फूटबल मैदानमा असोज २९ गतेदेखि जारी ‘१८औं गोदावरी पुष्प प्रदर्शनी, २०८२’ मा दैनिक अवालेकनकर्ताहरूको बाक्लो भीड लाग्ने गरेको छ ।

फ्लोरिकल्चर एसोसिएशन नेपालको आयोजनामा जारी प्रदर्शनीमा दैनिक एक लाख रुपैयाँभन्दा बढीको कारोबार भइरहेको पुष्प व्यवसायी बलराम कार्कीले बताए ।

उनले भने, ‘पुष्प प्रदर्शनी विशेषगरी व्यापारलाई प्रवर्द्धन गर्ने र ग्राहकले सहज र सुलभ रूपमा एकै स्थानमा धेरै थरीका फूल किन्न सकून् भन्ने उद्देश्यका साथ आयोजना गरिन्छ । प्रदर्शनीले फूलको बजारीकरण गर्न धेरै महत्त्वपूर्ण भूमिका खेलेको छ । सोचेअनुसारको व्यापार पनि भइरहेको छ ।’

कात्तिक २ गतेसम्म चल्ने प्रदर्शनीमा सञ्जीवनी नर्सरीको स्टलमा विभिन्न प्रकारका फूलहरू, खासगरी गोदावरीका ५०/६० प्रजातिहरू राखिएको उनले सुनाए ।

पुष्प व्यवसायी कार्कीले आफूहरूको स्टलमा मूल्य ५० रुपैयाँदेखि दश हजार रुपैयाँसम्मको गोदावरी फूलका प्रजाति उपलब्ध रहेको जानकारी दिए ।

तर, नेपालमा पुष्प व्यवसायको भविष्य उज्ज्वल रहेन पनि सरकारले यसलाई नजरअन्दाज गर्दै आएको उनको गुनासो छ ।

‘नेपालमा सरकारी निकायबाट यस्ता मेलाहरूको आयोजना नै हुँदैन । अहिलेसम्म व्यवसायीहरू स्वयंले नै आयोजना गर्दै आएका छौं । फूल उत्पादन गरेर मात्र हुँदैन, बजारसम्म पुर्‍याउनु पनि पर्छ,’ उनले भने, ‘सरकारले केही नगरे पनि यस्तो प्रदर्शनीले व्यवसायलाई ‘प्रमोट’ गर्न र बजारसम्म पुर्‍याउन ठूलो सहयोग पुर्‍याएको छ ।’

गोदावरी फूलले नेपालको हिन्दु परम्परामा विशेष महत्त्व राख्दछ र तिहारको समयमा यसको माग अत्यधिक हुन्छ । गोदावरी फूल घर सजावटका लागि पनि प्रचलित छ र यसका विभिन्न प्रजातिहरू नेपालमै उत्पादन हुन्छ ।

नेपालमा विदेशी उत्पादनका फूलहरू भित्रिने गरे नेपाली उत्पादन नै सस्तो र गुणस्तरीय रहेकाले यसको प्रवर्द्धनका लागि सरकारी सहयोग आवश्यकता रहेको व्यवसायी कार्कीले बताए ।