ड्युटी सकिएको भन्दै बीचैमा विमान अवतरण गर्ने पाइलटलाई सामान्य सोधपुछ गरिने

पोखरा मंसिर ७, नेपाल एयरलाइन्सको ट्विन अटर विमान काठमाडौंबाट रुकुमको चौरजहारी पुग्नुपर्नेमा नेपालगञ्ज विमानस्थलमा अतवरण भएपछि यतिबेला पाइटलको व्यवहारका विषयमा प्रश्न उठेको छ ।

काठमाडौंदेखि रुकुमको चौरजहारीका लागि यात्रा तय गरेका यात्रुहरु पाइलटले ड्युटी सकिएको भन्दै नेपालगञ्जमा अवतरण गराएपछि पाइलटको आलोचना भएको छ । पाइलट पेम्बा शेर्पाको ड्यिुटी सोमबार दिउँसो ४ बजेसम्मका लागि थियो । काठमाडौंबाट रुकुमका लागि विमान उडान गरेका शेर्पाले नेपालगञ्ज माथि पुग्दा ४ बजिसकेको थियो । उनले आफ्नो ड्युटी सकिएको भन्दै यात्रुलाई नेपालगञ्ज विमानस्थलमै अवतरण गराएका थिए ।

यस विषयमा नेपाल एयरलाइन्सका कार्यकारी अध्यक्ष युवराज अधिकारीले उक्त घटना भएको स्वीकार गर्दै पाइलटलाई सामान्य सोधपुछ मात्रै हुने बताए । ‘घटना भएको हो, ठूलो घटना होइन, पाइलटलाई सामान्य सोधपुछ हुन्छ,’ उनले भने । पाइलटले ड्युटी आवर सकिएकाले सामान्य घटना घटेको उनको भनाइ छ ।