२ सातामा २ सय ८० प्रतिशतसम्म बढ्यो तरकारीको मूल्य

काठमाडौं । हरियो तरकारीको मूल्य २ सय ८० प्रतिशतसम्म बढेको पाइएको छ ।

कालीमाटी फलफूल तथा तरकारी बजार विकास समितिको दैनिक मूल्य सूचीअनुसार पछिल्लो २ सातामा यति ठूलो परिमाणमा तरकारीको मूल्य बढेको देखिएको हो । बजारमा तरकारी आगमनको स्थितिमा कुनै समस्या नभए पनि अस्वाभाविक रूपमा मूल्य बढ्दा सर्वसाधारण उपभोक्ता प्रत्यक्ष मारमा परेका छन् ।

सबैभन्दा धेरै मूल्य बढ्ने तरकारीमा गोलभेडा रहेको छ । असोज १४ गते प्रतिकिलो १२ रुपैयाँ औसत थोक मूल्य रहेको सानो लोकल गोलभेडाको मूल्य पछिल्लो २ सातामा २ सय ८० प्रतिशतले वृद्धि हुँदै प्रतिकिलो ४५ रुपैयाँ कायम भएको छ । टनेलको गोलभेडाको मूल्य पनि १ सय ७८ प्रतिशतले वृद्धि हुँदै प्रतिकिलो २० रुपैयाँबाट ५५ रुपैयाँ पुगेको छ । त्यसैगरी घिरौंलाको मूल्य ७३ प्रतिशतले बढेर प्रतिकिलो ५५ रुपैयाँबाट बढेर ९५ रुपैयाँ कायम भएको छ ।

स्थानिय काउलीको मूल्य पनि ५० प्रतिशतले वृद्धि हुँदै ६० रुपैयाँ बाट ९० रुपैयाँ किलो पुगेको छ । धेरै मूल्य बढ्ने तरकारीमा तितेकरेला, तनेबोडी, भिण्डी, चिचिन्डो र लौका पनि रहेका छन् । २ साता अघिको मूल्यमा २५ रुपैयाँ बढेर तितेकरेलाको मूल्य प्रतिकिलो १ सय रुपैयाँ पुगेको छ भने तनेबोडीको मूल्य ५० रुपैयाँले बढेर ७५ रुपैयाँ प्रतिकिलोबाट १ सय २५ रुपैयाँ पुगेको छ । समितिको दैनिक तरकारी आगमनको तथ्यांकलाई हेर्ने हो भने हरेक दिनजसो ८ सय देखि ९ सय टनसम्म तरकारी कालीमाटीमा भित्रिने गरेको छ । आपूर्ति प्रणालीमा कुनै समस्या नभए पनि तरकारीको मूल्य भने बढेको बढ्यै छ ।

कालीमाटी फलफूल तथा तरकारी बजार विकास समितिका सुचना अधिकारी विनय श्रेष्ठले समग्रमा आपूर्ति प्रणाली राम्रो देखिए पनि सबै तरकारीको आपूर्ति एकनासको नहुँदा कुनै तरकारीको मूल्य अस्वाभाविक तरीकाले बढेको देखिएको बताए ।

‘अहिले धेरै मूल्य बढेका तरकारीको आपूर्ति निकै कम भएकाले मूल्य एकाएक बढेको हो । नयाँ तरकारी उत्पादन भइसक्ने बेला भएको छैन । त्यसैले नयाँ तरकारी बजारमा नआउने बेलासम्म मूल्य कम हुँदैन,’ उनले आर्थिक अभियान दैनिकसँग भने । आपुर्ति प्रणालीमा कुनै समस्या नभए पनि तरकारीको मूल्य निरन्तर बढ्नु राम्रो संकेत नभएको उपभोक्ता अधिकारकर्मीहरूले बताउने गरेको आजको आर्थिक अभियान दैनिकमा समाचार छ ।