अमेरिकामा हजारौँ कर्मचारीको जागिर चट, कार्यालय पुगेकाहरू भित्र छिर्न पाएनन्

काठमाडौँ । अमेरिकी सरकारले आफ्ना विभिन्न स्वास्थ्य संस्थानहरूमा कार्यरत कर्मचारीहरूलाई हटाउने भएको छ । यसअन्तर्गत हजारौँ कर्मचारीहरूलाई निकाल्ने निर्णयले स्वास्थ्य क्षेत्रमा हलचल सिर्जना गरेको छ ।

मङ्गलबार बिहान धेरै कर्मचारीहरूलाई आफ्नो कार्यालय पुग्दा ढोकामै रोकिएको थियो । उनीहरूलाई प्रवेश निषेध गरी रोजगारीबाट हटाइएको हो । यसले प्रभावित कर्मचारीहरूमाझ आक्रोश र निराशा छाएको छ ।

सरकारको यस निर्णयबाट विभिन्न स्वास्थ्य संस्थानका शीर्ष अधिकारीहरूसमेत रोजगारविहीन भएका छन् । अमेरिकाका स्वास्थ्यमन्त्री रोबर्ट एफ केनेडी जुनियरले गत हप्ता नै १० हजार कर्मचारीहरूलाई निकालिने घोषणा गरेका थिए ।

खाद्य तथा औषधि प्रशासन (एफडीए) का तीन हजार पाँच सय, रोग नियन्त्रण तथा रोकथाम केन्द्र (सीडीसी) का दुई हजार चार सय र राष्ट्रिय स्वास्थ्य संस्थान (एनआईएच) का एक हजार दुई सय कर्मचारीलाई हटाउन लागिएको हो ।

सरकारले याे निर्णयको कारण आर्थिक मितव्ययिता र प्रशासनिक सुधारलाई जनाएको छ । तर, विपक्षी दलहरूले यसलाई स्वास्थ्य सेवामा कटौतीको षड्यन्त्र भनेर आलोचना गरेका छन् ।

यो निर्णयपछि प्रभावित कर्मचारीहरू अब आफ्नो भविष्यका लागि वैकल्पिक योजना बनाउन बाध्य भएका छन् । यसले अमेरिकी स्वास्थ्य प्रणालीमा दीर्घकालीन प्रभाव पार्न सक्ने विश्लेषकहरूको चिन्ता छ ।