गुल्मीमा जिप दुर्घटना हुँदा तीनको मृत्यु, ६ जना घाइते

गुल्मी । गुल्मीको रेसुंगा नगरपलिका–१० स्थित पाँचरातेमा जिप दुर्घटना हुँदा तीन जनाको मृत्यु भएको छ भने ६ जना घाइते भएका छन् ।

बुटवलबाट तम्घास आउँदै गरेको लु १ ज ४४९० नम्बरको जिप दुर्घटना भएको हो । जिप सडकबाट करिब पाँच सय मिटर तल खसेको छ प्रहरीको भनाई छ । घाइते मध्ये तीन जनाको अवस्था गम्भीर छ ।

दुर्घटनामा मुसिकोट नगरपालिका २ जलजलेका ४५ बर्षीया राधिका थापा, मुसिकोट नगरपालिका–२ जलजले का ७२ बर्षीय क्षेत्रबहादुर थापा र मुसिकोट नगरपालिका–३ चुदरीगाउँका १९ बर्षीया संगिता सुनारको मृत्यु भएको जिल्ला प्रहरी कार्यालयका प्रमुख प्रहरी उपरीक्षक गोपालचन्द्र भट्टराईले बताए ।

भट्टराईका अनुसार दुर्घटनामा मुसिकोट नगरपालिका २ जलजले बस्ने ३८ बर्षीया जुना थापा, मुसिकोट नगरपालिका ३ चुदारीगाउँका ४७ वर्षीया सुमित्रा सुनार, र भरतपुर उपमहानगरपालिकी ५० बर्षीया राधा केसी गम्भीर घाइते छन् । उनीहरुको शरीरमा चोट लागेको छ ।

मुसिकोट नगरपालिका २ जलजलेका गाडी चालक २६ बर्षीय कमल थापा, मुसिकोट नगरपालिका २ जलजलेकी ४३ बर्षीया खिमा थापा र मुसिकोट नगरपालिका २ जलजलेका ३६ बर्षीय राजु थापा सामान्य घाइते भएका छन् । घाइतेको गुल्मी अस्पताल र पाल्पाका विभिन्न अस्पतालमा उपचार भइरहेको प्रहरीले जनाएको छ ।