टोखामा आगलागीबाट एक करोडको क्षति

काठमाडाैं । काठमाडौँको टोखामा आगलागी हुँदा  एक करोड रूपैयाँ बराबरको क्षति भएको छ ।

टोखा नगरपालिका–८ मिलनटोलस्थित मिलन बजारमा गए राति धर्मराज डङ्गोलको मासु पसलमा ग्यास लिक भई आगलागी भएको हो । जिल्ला प्रहरी परिसर काठमाडौँका प्रवक्ता, प्रहरी उपरीक्षक सीताराम रिजालका अनुसार आगलागीबाट पाँच पसलमा रहेका सामान नष्ट भएका छन् ।

तीन खाली सटरसमेत जलेर नष्ट भएका छन् । आगालागीबाट कमला तामाङले सञ्चालन गरेको जुत्ता पसल जल्दा  १६ लाख रूपैयाँ, मुना थापाले सञ्चालन गरेको फेन्सी पसल जल्दा ३५ लाख रूपैयाँ , प्रदीप लम्सालले सञ्चालन गरेको डेरी जल्दा दुई लाख रूपैयाँ , विकास श्रेष्ठले सञ्चालन गरेको सिलाइ कपडा पसल जल्दा  दुई लाख रूपैयाँ, मधु न्यौपानेले सञ्चालन गरेको मोबाइल पसल जल्दा २० लाख रूपैयाँ  र धर्मराज डङ्गोलले सञ्चालन गरेको मासु पसल जल्दा  २५ लाख रूपैयाँको क्षति भएको रिजालले जानकारी दिए ।

यस्तै श्याम श्रेष्ठ, टेकराज पोखरेल र धनबहादुर बस्नेतको पसलको सटरसमेत जलेर नष्ट भएको छ । नेपाल प्रहरी, स्थानीयबासी र दमकलको सहयोगमा आगो निभाइएको प्रहरीले जनाएको छ ।