होर्मुज़ जलडमरूमध्यबाट आवतजावत गर्ने तेल ट्यांकरलाई अमेरिकी सेनाले सुरक्षा दिन्छ : ट्रम्प

काठमाडौं । अमेरिकी राष्ट्रपति डोनाल्ड ट्रम्पले आवश्यक परेमा होर्मुज़ जलडमरूमध्यबाट आवतजावत गर्ने तेल ट्यांकरलाई अमेरिकी नौसेनाले सुरक्षा प्रदान गर्ने बताएका छन् ।

अमेरिका-इजरायल र इरानबीच जारी युद्धका कारण उक्त समुद्री मार्गबाट जहाज सञ्चालन लगभग ठप्प जस्तै भएको छ । होर्मुज़ जलडमरूमध्य पर्सियन खाडी र ओमानको खाडीबीच अवस्थित महत्वपूर्ण समुद्री मार्ग हो ।

विश्व ऊर्जा आपूर्तिका लागि यो मार्ग अत्यन्तै संवेदनशील मानिन्छ। दैनिक करिब दुई करोड ब्यारेल तेल यही बाटो हुँदै विश्व बजारमा पुग्ने गरेको तथ्यांक छ । युद्धका कारण सुरक्षा जोखिम बढेपछि विश्व बजारमा तेल आपूर्ति प्रभावित हुने चिन्ता बढेको छ ।

राष्ट्रपति ट्रम्पले खाडी क्षेत्रमा समुद्री व्यापार सुरक्षित राख्न एक संघीय निकायलाई ‘राजनीतिक जोखिम बीमा तथा ग्यारेन्टी’ व्यवस्था मिलाउन निर्देशन दिएको पनि बताएका छन् । यस कदमले व्यापारिक जहाज र तेल ट्यांकरको आवतजावतलाई सहज बनाउन सहयोग पुग्ने अपेक्षा गरिएको छ ।

विशेषज्ञहरूका अनुसार होर्मुज़ मार्गमा कुनै अवरोध आए विश्व ऊर्जा बजारमा तत्काल प्रभाव पर्न सक्छ । त्यसैले अमेरिकी सुरक्षा घोषणा क्षेत्रीय तनावको बीचमा महत्वपूर्ण मानिएको छ ।