एसीसी प्रिमियर कप: सिंगापुरलाई यूएईले दियो ४७२ रनको विशाल लक्ष्य

काठमाडौं। नेपालमा जारी एसीसी प्रिमियर कप क्रिकेटमा यूएईले सिंगापुरलाई ४७२ रनको विशाल लक्ष्य दिएको छ। कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ गरेको यूएईले ४७१ रन बनाएको हो।

कीर्तिपुर मैदानमा हुने ५० ओभरको खेलमा यो स्कोर अहिलेसम्मकै उच्च हो। यसअघि यहि प्रतियोगितामा कुवेतसँगको खेलमा यूएईले ३७१ रन बनाएको थियो।

यूएईका लागि कप्तान मोहमद वासिम र वृत्य अरबिन्दले शतकीय पारी खेले। २२ रनमा पहिलो विकेट गुमाएको यूएईका लागि उनीहरुले दोश्रो विकेटका लागि २४६ रनको साझेदारी गरे।

१७४ रन बनाएका अरबिन्दले १७ चौका र ७ छक्का हाने। वासिमले विस्फोटक ब्याटिङ गर्दै ८२ बलमा १६० रन बनाए। उनले ९ चौका र १६ छक्का हानेका थिए। आयान अफजल खानले ५० बलमा ७४ रन बनाए।

यता मुलपानी क्रिकेट मैदानमा भइरहेको अर्को खेलमा भने मलेसियाले ओमानलाई २२८ रनको लक्ष्य दिएको छ।

यस्तै युवा ओपनर आर्यन लाक्रा सात बलमा दुई २ चौकासहित १२ रनमा आउट भए । आसिफ खान ११ तथा रोहन मुस्तफा तीन रनमा आउट भए ।

बलिङतर्फ सिङ्गापुरका आदित्य भर्गवले चार विकेट लिए भने रमेश कलिमुथुले तीन विकेट हात पारे । त्यस्तै विनोथ भास्करनले दुई विकेट लिदाँ मनप्रित सिंहले एक विकेट लिए ।