भुटानी शरणार्थी प्रकरणः खाँण र रायमाझीले दशैँ कारागारमै मान्ने

काठमाडौँ । नक्कली भुटानी शरणार्थी बनाएर अमेरिका पठाउने भन्दै ठगीमा संलग्न रहेकाहरुको थुनछेक निवेदनमा पुनः अन्य आदेश भएर टुंगिएको छ । बिहीबार पाटन उच्च अदालतमा तोकिएको पेसीमा लगाएको मुद्दा साथै राख्ने आदेश दिएर बिहीबारको सुनुवाइ सकिएको छ ।

बिहीबार उच्च अदालत पाटनका न्यायाधीशद्वय गोकर्ण डाँगी र नारायणप्रसाद रेग्मीको इजलासमा परेको थियो । थुनामुक्त भई मुद्दाको पुर्पक्ष गरिपाऊँ भनी उच्च अदालतमा दर्ता भएको निवेदनमा सोही प्रकरणसँग जोडिएको अर्को निवेदन पनि आएपछि लगाएको मुद्दा साथै राख्ने आदेश भएर बिहीबारको सुनुवाइ सकिएको हो ।

नक्कली भुटानी शरणार्थी बनाएर अमेरिका पठाउने भन्दै एकै व्यक्तिबाट ४५ लाखसम्म लिएर ठगी र संगठित अपराध गरेको भन्दै काठमाडौँ जिल्ला अदालतले पूर्व गृहमन्त्री बालकृष्ण खाँण, टोपबहादुर रायमाझी लगायतलाई थुनामा पठाएको थियो ।

काठमाडौँ जिल्ला अदालतको आदेश बेरितको भएको र थुनामुक्त भएरै मुद्दा लड्न पाउनुपर्ने माग गर्दै पूर्व गृहमन्त्री बालकृष्ण खाँण, पूर्वमन्त्री टोपबहादुर रायमाझीलगायतले गत साउन १२ गते उच्च अदालत पाटनमा निवेदन दर्ता गराएका थिए । यसअघि नै ४ पटक पेशीमा चढिसकेको उक्त निवेदनमा असोज २५ गते पुनः लगाएको मुद्दा साथै राख्ने आदेश भएपछि पाँचौपटक पेसीमा चढेर पनि सुनुवाइ हुन नसकेको हो ।

असोज २५ गते बिहीबार पनि उक्त निवेदनमाथि सुनुवाइ हुन नसकेपछि यो प्रकरणको अर्को पेसी अब दसैँपछिको पहिलो बिहीबार हुनेछ ।