मूल्य वृद्धि नहुने गरी आपुर्ती व्यवस्था सहज बनाउन मन्त्री रिजालको निर्देशन

काठमाडौँ । उद्योग वाणिज्य तथा आपूर्ती मन्त्री रमेश रिजालले खाद्य पदार्थको मूल्य वृद्धि नहुने गरी मुलुकको आपुर्ती व्यवस्था सहज बनाउन निर्देशन दिएका छन् ।

बुधबार मन्त्रालयमा भएको मुलुकको आपूर्ती व्यवस्थाको समिक्षा सहित आपूर्ती व्यवस्था सहज र नियमित बनाउने सम्बन्धी छलफल कार्यक्रममा मन्त्री रिजालले यस्तो निर्देशन दिए ।

आपूर्ति व्यवस्थामा आउन सक्ने समस्या समाधान गर्न आफ्नो पूर्ण साथ र सहयोग रहने मन्त्री रिजालले स्पष्ट पारे । आपूर्तिसँग सम्बद्ध सम्पूर्ण सरोकारवाला निकायहरु सजग रही आपूर्ति श्रृंखलामा कुनै कमी कमजोरी हुन नदिन सबैले आ आफ्नो तर्फबाट भूमिका निर्वाह गर्न निर्देशन दिए मन्त्री रिजालले मन्त्रालयको तर्फबाट अत्यावश्यक वस्तुहरुको आपूर्तिमा सबै प्रकारको सहजीकरण गरिने प्रतिबद्धता व्यक्त गरे ।

कार्यक्रममा उद्योग, वाणिज्य तथा आपुर्ती मन्त्रालयका सचिव मधुकुमार मरासिनीले सबै सरकारी तथा निजी क्षेत्रले आपसी सहकार्यमा आपुर्ती व्यवस्था सहज र व्यवस्थित बनाउन लाग्नुपर्ने बताए । कार्यक्रममा आसन्न चाडपर्वलाई लक्षित गरी बजार अनुगमनलाई तीव्रता दिने र भारतले चामल निर्यातमा लगाएको प्रतिवन्धको नीतिले सिर्जना गर्नसक्ने समस्या समाधान गर्ने विषयमा समेत छलफल भयो । विभिन्न मन्त्रालय तथा विभागका पदाधिकारीहरुले आपूर्ति व्यवस्थालाई सहज, सरल र नियमित बनाउन आ आफ्नो निकायबाट पूर्ण सहयोग रहने प्रतिवद्धता व्यक्त गरे ।

त्यसैगरी निजी क्षेत्रका प्रतिनिधिहरुले मुलुकमा खाद्यान्न लगायतका अत्यावश्यक वस्तुहरुको मौज्दात पर्याप्त रहेको बताउदै तत्कालै खाद्यान्न अभावको अवस्था सिर्जना नहुने र अनुचित मूल्य बृद्धि हुन नदिने प्रतिबद्धता व्यक्त गरे ।