बैंकको अन्धाधुन्दा लगानीमा राष्ट्र बैंकले आँखा चिम्लिदा समस्या आयो: उमेशलाल श्रेष्ठ

काठमाडौं । नेपाल उद्योग वाणिज्य महासंघको आसन्न निर्वाचनका वरिष्ठ उपाध्यक्षका उम्मेदवार उमेशलाल श्रेष्ठले नेपाल राष्ट्र बैंकले बैंक तथा वित्तीय संस्थालाई सबल रूपमा नियमन गर्न नसक्दा अहिले समस्या उत्पन्न भएको बताएका छन् ।

‘बैंकको कर्जा अर्थतन्त्रमा योगदान पुर्‍याउने खास खासमा क्षेत्रमा प्राथमिकताका आधारमा प्रवाह हुनुपर्छ,’ नेपाल उद्योग वाणिज्य महासंघ कोशी प्रदेशको पाँचौँ वार्षिक साधारण सभालाई सम्बोधन गर्दै उनले भने, ‘तर कोरोना समयमा कर्जा प्रवाह नहुँदा बैंकले उद्योगी व्यवसायीलाई विना योजना सस्तो ब्याजदरमा ऋण दियो तर तत्कालीन समयमा हचुवाको भरमा लिएको ऋण सदुपयोग नहुँदा अहिले समस्या देखिएको छ ।’

विशेषगरी नियामक निकाय नेपाल राष्ट्र बैंकले बैंक तथा वित्तीय संस्थाको कामलाई नियमन नगर्दा अहिले समस्या निम्तिएको समेत उनले जानकारी दिए ।

‘राष्ट्र बैंक नियामक निकाय भएपछि बैंक तथा वित्तीय संस्थाले के कस्ता क्षेत्रमा कर्जा प्रवाह गरिरहेका छन् भनेर नियमन गर्नुपर्दथ्यो,’ उनले भने, ‘कोभिडको समयमा बैंकमा निक्षेप थुप्रिदा बैंकका कर्मचारीले घरघरमा पुगेर कर्जा दिए तर त्यो कर्जा केका लागि दिइयो भनेर कसैले अनुगमन गरेनन् ।’

कोरोनापछि बैंकले गरेको लगानीका सही सदुपयोग नहुँदा देशमा उद्योग कलकारखाना धराशायी बन्न पुगेको समेत उनको भनाई थियो । अहिले देशमा आर्थिक मन्दीका कारण समस्या आएको भन्दै सो विषयमा गहन अध्ययन हुनुपर्ने उनको भनाई थियो ।

‘नेपाल राष्ट्र बैंकको अकर्मण्ड्यता र सरकारको अदुरदृष्टिको मार अहिले उद्योगी व्यवसायीले भोग्नु परेको छ,’ उनले भने, ‘हामीले कृषि क्षेत्रलाई उकास्न सहुलियतपूर्ण कर्जा दियौँ तर त्यसको अर्थतन्त्रमा के कति योगदान भयो ? यस विषयमा सरकारले अध्ययन अनुसन्धान गर्नुपर्छ कि पर्दैन ?’

यसैगरी समयको माग र साथीहरूको आग्रह अनुरूप पुनः महासंघको वरिष्ठ उपाध्यक्ष दावेदारी गरेर चुनावी मैदानमा आएको जानकारी दिँदै अब हुने निर्वाचनमा सहयोग गर्न आग्रह गरे ।

‘म महासंघमा विगत ३० वर्षदेखि लागिरहेको छु भने यसअघि उपाध्यक्षमा चुनाव हारेपछि पनि जिल्ला नगरको समस्या बुझ्न प्रायजसो सबै जिल्लाको भ्रमण गरे भने विभिन्न बस्तुगत संघसँग पनि छलफल गरे,’ उनले भने, ‘अहिले पनि जिल्ला नगरका समस्या उस्तै छ तसर्थ उक्त समस्या समाधानका निमित्त वरिष्ठ उपाध्यक्षमा उम्मेदवारी दिएर चुनावी मैदानमा होमिएको छु ।’

सरकारले व्यवसायीका जायज मागलाई सम्बोधन नगर्दा आन्दोलनमा उत्रन परेको भन्दै यस विषयमा अबका दिनमा सबै सरोकारवालाहरू एक ठाउँमा बसेर छलफल गरेर निकास दिनुपर्ने उनको तर्क थियो ।

‘हामीले ब्याजदरलगायत अन्य विषयलाई लिएर धेरै ज्ञापन पत्र बुझायौ भने सोही अनुरूप आन्दोलन पनि गरियो तर महासंघको आवाजलाई सकारले सुनेन,’ उनले भने, ‘पछिल्लो समय महासंघको साख गिरेका कारण सरकार लगायत सरोकारवाला निकायले हामीलाई बेवास्ता गरिरहेको छ ।’

महासंघको उक्त गिरेको साखलाई जोगाउँदै अझ दरिरो रूपमा अघि बढाउन आफूले वरिष्ठ उपाध्यक्षमा उम्मेदवारी दिएको समेत उनले जानकारी दिए ।