अपर तामाकोशीमा करोडौं मूल्यका सामान चोरी, के भन्छ कर्मचारी युनियन ?

दोलखा । राष्ट्रिय गौरव बोकेको ४५६ मेगावाट क्षमताको अपर तामाकोशी हाइड्रोपावरबाट करोडौं रूपैयाँ मूल्य बराबरका विभिन्न सरसामानहरू चोरी भएका छन् ।

गएको असोज ११ र १२ गतेको भीषण वर्षापछि आएको बाढी र पहिरोले क्षति पुर्‍याएको बाँधस्थलका कन्ट्रोल विल्डिङ र सेटलिङ बेसिनलगायतका संरचनाहरू मर्मतका क्रममा निकालिएका महत्त्वपूर्ण सामग्रीहरू चोरी भएको अपर तामाकोशी हाइड्रोपावर लिमिटेड कर्मचारी युनियनले जनाएको छ ।

युनियनले सोमबार ध्यानाकर्षणपत्र जारी गर्दै आयोजनाबाट महत्त्वपूर्ण सामग्रीहरू शंकास्पद र रहस्यमयी ढंगबाट चोरी भएको जनाउँदै आवश्यक छानबिन गरी दोषीउपर कडा कारबाही गर्न अनुरोधसमेत गरेको छ ।

‘तीनै तहको सुरक्षा घेराभित्र रहेको अवस्थामा विगतमा पनि आयोजनाका करोडौं करोड पर्ने क्रेनलगायत बहुमूल्य सम्पत्ति चोरी भएको सर्वविदितै छ । यसरी अपर तामाकोशी कम्पनीको सम्पत्ति पटकपटक चोरी निकासी हुनु रहस्यमय र शंकास्पद विषय भएकाले अपर तामाकोशीको सार्वजिनक सम्पत्ति दोहन र चोरी निकासी गर्नमा संलग्नमाथि आवश्यक छानबिन गरी दोषीउपर कडाभन्दा कडा कानुनी कारबाहीका लागि यस युनियन सम्बन्धित पक्षसँग जोडदार माग गर्दछ,’ ध्यानाकर्षणपत्रमा भनिएको छ ।

खासगरी बाढीबाट बाँधस्थलका क्षतिग्रस्त कन्ट्रोल विल्डिङ र सेटलिङ बेसिनलगायतका संरचनाहरू मर्मतका क्रममा निकालिएका जीर्ण भएका विद्युतीय उपकरण, तामा, फलाम, आल्मुनियम र अन्य धातुजन्य कवाडी सामग्रीहरू चोरी भएको युनियनका अध्यक्ष शेषनारायण श्रेष्ठले बताए । चोरी भएका ती सामग्रीहरू करोडौं मूल्य पर्ने अपर तामाकोशी हाइड्रोपावर लिमिटेड कम्पनीको सम्पत्ति भएको उनको भनाइ छ ।

युनियनका अध्यक्ष शेषनारायण श्रेष्ठ र महासचिव राजकुमार श्रेष्ठद्वारा संयुक्त रूपमा हस्ताक्षर गरिएको ध्यानाकर्षणपत्रमा भनिएको छ, ‘क्षतिग्रस्त कन्ट्रोल विल्डिङलगायतका स्थानहरूको सरसफाइ गर्ने क्रममा निकालिएको जीर्ण भएका विद्युतीय उपकरण, तामा, फलाम, आल्मुनियम र अन्य धातुजन्य कवाडी सामग्रीहरूलगायतका करोडौं पर्ने अपर तामाकोशी हाइड्रोपावर लिमिटेड कम्पनीका सम्पत्ति चोरी निकासी भएको सञ्चारमाध्यमबाट जानकारी प्राप्त हुँदा यस युनियनको गम्भीर ध्यानाकर्षण भएको छ ।’

तीन तहको सुरक्षा घेरा रहेको आयोजना परिसरबाट बहुमूल्य सामग्रीहरू चोरी हुनु शंकास्पद रहेको युनियनको ठहर छ ।

असोज ११ र १२ गतेको वर्षापछि आएको बाढीबाट क्षति भएको आयोजनाका विभिन्न संरचनाहरू हाल मर्मतसम्भार भइरहेको छ । क्षतिग्रस्त स्थानको सरसफाइ र कम क्षतिको सेटलिन बेसिनको मर्मत कार्य ‘डे वर्क्स’मा अपर तामाकोशी हाइड्रोपावर लिमिटेडद्वारा प्रवर्द्धित रोल्वालिङ खोला जलविद्युत आयोजनाका मुख्य सिभिल ठेकेदार हाइ हिमाल हाइड्रो कम्पनीबाट भइरहेको छ ।

हेर्नुहाेस् अपर तामाकोशी हाइड्रोपावर लिमिटेड कर्मचारी युनियनकाे विज्ञप्ति-