उम्मेदवारलाई विकास निर्माणबारे ध्यानाकर्षण गराउँदै मतदाता

काठमाडौँ । रुपन्देही– १ का प्रतिनिधि सभा र प्रदेश सभाका उम्मेदवार मतदाताको  घरदैलोमा पुगेर राय सुझाव लिएका छन् । प्रतिनिधि सभाका उम्मेदवार छविलाल विश्वकर्मा र प्रदेश सभा (२) का उम्मेदवार दधिराम न्यौपाने बिहीबार रोहिणीको वडा नम्बर १ र २ तथा ओमसतियाको वडा नम्बर ४ का मतदाताको घरदैलोमा पुगेका हुन् ।

घरदैलोका क्रममा उम्मेदवारसँग मतदाताले बसन्तपुर–गणेशनगर सडक छिटो पूरा गर्न सके दक्षिणी क्षेत्रका जनतालाई पूर्व पश्चिम राजमार्ग पुग्न सहज र छिटो हुने भन्दै उम्मेदवारको ध्यानाकर्षण गराए । यस्तै मतदाताले सडक, पिउने पानी र सिँचाइको राम्रो व्यवस्था गर्न माग गरे ।

मतदाताले देशको हित, राष्ट्रियताको रक्षा र विकासका लागि फेरि पनि एमाले राप्रपा र जसपाको गठबन्धनले जित्नुपर्ने भदै जितको शुभकामनासहित आशीर्वाद दिएका छन् ।

सो अवसरमा प्रतिनिधि सभा उम्मेदवार छविलाल विश्वकर्माले एमाले सरकारले तराई मधेसमा हुलाकी राजमार्ग र सदरमुकाम जोड्ने सडकका लागि ठुलो बजेट छुट्टाएकाले मधेसको विकास हुन थालेको बताए ।  प्रदेश सभा उम्मेदवार दधिराम न्यौपानेले एमाले सरकारले अघि बढाएका विकास निर्माणका अधुरा योजना पुरा गर्न फेरि एमालेले जित्नुपर्ने बताए ।

राप्रपाका सहमहामन्त्री ताहिर अली भाटले रुपन्देही १ मा एमाले राप्रपा जसपा गठबन्धन विपक्षी भन्दा ठुलो मतान्तरले अगाडि रहेकाले उत्साहित भएर जनतालाई मतदाता शिक्षा दिनुपर्ने सुझाव दिए । घरदैलोमा एमाले क्षेत्रीय संयोजक वेद गिरी,जिल्ला कमिटी सदस्य प्रदीप पाण्डे जसपाकी प्रदेश सभाका समानुपातिक उम्मेदवार मधु सिंह लगायत सहभागी थिए ।  मतदाताले न्यानो माया र आशीर्वाद दिएपछि एमाले उम्मेदवारहरू उत्साहित भएका छन् ।