अफगान नागरिक नेपाल प्रवेश गर्दा न सीमा क्षेत्रको सुरक्षा संयन्त्रले थाहा पायो, न त सरकारले

काठमाडौं । भारतको बाटो हुँदै अफगान नागरिकहरू नेपाल आएको पाइएपछि अहिले दक्षिणी सीमानाकाहरूमा सुरक्षाजाँचमा कडाइ गरिएको अधिकारीहरूले बताएका छन् ।

गृह मन्त्रालयका अनुसार सोमवार काठमाण्डूबाट अवैध रूपमा नेपाल छिरेका ११ जना अफगान नागरिकलाई पक्राउ गरिएको छ।पक्राउ परेका अफगान नागरिकहरू भारतबाट सुनौली हुँदै रूपन्देही जिल्लाको बेलहिया नाकाबाट नेपाल प्रवेश गरेका थिए।

उक्त नाकाबाट स्थलमार्ग हुँदै नेपालमा सबैभन्दा बढी विदेशी पर्यटक भित्रिन्छन्। ठूलो सङ्ख्या भारतीय र नेपालीहरू भैरहवा नजिकै अवस्थित उक्त नाकाबाट सीमा वारपार गर्ने गर्छन्।

भारततर्फ प्रवेश गर्दा सुरक्षाजाँच अनिवार्य रूपमा गर्नु परे पनि नेपाल आउन यससम्बन्धी कुनै प्रक्रिया पूरागर्नु पर्दैन। अर्थात् भारतको बाटो भएर जुन देशका नागरिक पनि नेपाल सजिलै प्रवेश गर्न सक्ने देखिन्छ।

 

गृह मन्त्रालयका प्रवक्ता फणीन्द्र पोखरेलका अनुसार नेपाल छिरेका अफगान नागरिकहरू दिल्लीबाट सुनौलीसम्म बसमा आएर नेपाल प्रवेश गरेको प्रारम्भिक अनुसन्धानमा देखिएको छ।

कुनै पनि मुलुकबाट प्रवेशाज्ञा नलिएकाहरूले वैधानिक रूपमा नेपाल प्रवेश पाउँदैनन् । तर भैरहवा हुँदै भित्रिएका अफगान नागरिकका बारेमा न सीमा क्षेत्रको सुरक्षा संयन्त्रले थाहा पायो, न त काठमाडौं आउन्जेलमा सरकारले ।