गोल्डेन बुटमा एमबाप्पे बलियो, गोल्डेन बलमा मेस्सी

काठमाडौं। कतार विश्वकपको उपाधि भिडन्त गर्नुअघि नै अर्जेन्टिनाका कप्तान लियोनल मेस्सी सर्वोत्कृष्ट खेलाडीलाई दिइने गोल्डेन बलका प्रमुख दावेदार बनेका छन्।

अर्जेन्टिनाले फाइनल पुग्नेक्रममा खेलेका ६ खेलमा मेस्सी चारवटामा प्लेयर अफ दी म्याच भएका छन्। यसअघि सन् २०१४ मा अर्जेन्टिना फाइनलमा जर्मनीसँग पराजित भएपनि गोल्डेन बल लियोनल मेस्सीलाई प्रदान गरिएको थियो। त्यतिबेला पनि मेस्सी चार खेलमा प्लेयर अफ दी म्याच घोषित भएका थिए। विश्वकप इतिहासमा एकै खेलाडीले दुईपटक गोल्डेन बल जितेको इतिहास छैन।

जारी विश्वकपमा मेस्सीले सर्वाधिक ५ गोल र ३ असिस्ट गरेका छन्। दोस्रो स्थानमा रहेका फ्रान्सका केलियन एमबाप्पेको नाममा ५ गोल र दुई असिस्ट रहेको छ। फ्रान्सकै ओलिभर जिरोड र अर्जेन्टिनाका जुलियान अल्भारेजले समान ४/४ गोल गरेका छन्। समूहगत चरणमा दुई गोल गरेका मेस्सीले नकआउट चरणका तिन खेलमा एक एक गोल गरेका छन्।

विश्वकपको दोस्रो सेमिफाइनलमा बुधबार साविक विजेता फ्रान्सले क्रोएसियासँग खेल्दै छ। एमबाप्पेले क्वाटरफाइनलमा गोल गर्न नसकेपछि मेस्सी र जिरोड गोल्डेन बुटको दौडमा उनीसँगै देखिएका थिए।।