प्रचण्डले गरे सरकार विस्तार, जसपाका मन्त्री र राज्यमन्त्रीले लिए शपथ

काठमाडौं । जनता समाजवादी पार्टी (जसपा) बाट मन्त्री भएका प्रदीप यादवले राष्ट्रपति रामचन्द्र पौडेल र राज्यमन्त्री बनेकी हसिना खानले प्रधानमन्त्री पुष्पकमल दाहाल प्रचण्डबाट शपथ लिएका छन् ।

राष्ट्रपति कार्यालय शीतल निवासमा जसपाबाट सरकारमा सहभागी भएका मन्त्री र राज्यमन्त्रीले शपथ लिएका हुन् ।

प्रधानमन्त्रीको सिफारिसमा जसपाका सांसद प्रदीप यादवलाई मन्त्री र हसिना खानलाई राज्यमन्त्री पदमा नियुक्त गरी स्वास्थ्य तथा जनसङ्ख्या मन्त्रालयको कार्यभार तोकिएको छ । २०७९ पुस ११ गते गठित मन्त्रिपरिषद्मा नेपालको संविधानको धारा, ७६ को उपधारा (९) बमोजिम यादव र खानलाई स्वास्थ्य मन्त्रालयको जिम्मेवारी तोकिएको हो ।

मन्त्री यादवले स्वास्थ्य तथा जनसङ्ख्या मन्त्रालयको जिम्मेवारी पाएका छन् भने खानले त्यही मन्त्रालयको राज्यमन्त्रीको जिम्मेवारी पाएकी छिन् । जसपा नेपाल सरकारबाट बाहिरिएपछि अशोक राई नेतृत्वको जसपा सरकारमा सहभागी भएको हो ।