साइमेक्स इन्ककी महाप्रबन्धक यमुना श्रेष्ठलाई ‘ग्रीन अटोमोटिभ एक्सिलेन्स अवार्ड’ (भिडिओ)

काठमाडौं । विद्युतीय गाडी ‘बीवाईडी’को नेपालका लागि आधिकारिक विक्रेता ‘साइमेक्स इन्क’ की महाप्रबन्धक यमुना श्रेष्ठले ‘ग्रीन अटोमोटिभ एक्सिलेन्स अवार्ड, २०२५’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा उहाँलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

यमुना श्रेष्ठ र साइमेक्स इन्कबारे

काभ्रेपलाञ्चोकको नमोबुद्ध नगरपालिका–९ छत्रेबाँझ दाप्चामा पिता लबरत्न र माता गणेश माया श्रेष्ठको कोखबाट जन्मिुनुभएकी यमुना श्रेष्ठ साइमेक्स इन्क प्रालिकी महाप्रबन्धक हुनुहुन्छ । प्रारम्भिक शिक्षाका साथै गाउँमै बाल्यकाल बिताउनुभएकी उहाँले अध्ययन सँगसँगै विभिन्न क्षेत्रमा काम गर्नुभयो ।

कामकै सिलसिलामा सन् २००४ मा जापान पुग्नुभएकी श्रेष्ठले त्यहाँ रेयुमाट कम्पनीमा सुपरभाइजर भएर एक वर्ष काम गर्नुभयो । त्यसपछि सन् २००५ मा जापानकै असाई क्याम्पेनमा प्रोजेक्ट लिडर बन्नुभयो भने सन् २००७ देखि २०१० सम्म नेपालको मेट्रोपार्क कन्सट्रक्शनको प्रोजेक्ट को–अर्डिनेटर भएर काम गर्नुभयो । त्यसपछि वि.स. २०७२ सालदेखि साइमेक्स इन्क प्रालिमा आबद्ध हुनुहुन्छ ।

नेपालमा विद्युतीय कार बीवाईडीको आधिकारिक विक्रेता रहेको साइमेक्स इन्क पछिल्लो समय नेपालमा सर्वाधिक विद्युतीय गाडी बिक्री गर्ने कम्पनी बनेको छ । सन् २०२४ मा ६ हजार थान गाडी बिक्री गरेर नेपालकै पहिलो नम्बरमा पर्न सफल भएको थियो । अटोमोबाइलका साथै हस्पिटालिटी क्षेत्रमा पनि उहाँले लगानी विस्तार गरिरहनुभएको छ । साइमेक्स बीवाईडी च्यारिटीमार्फत उहाँले विभिन्न सामाजिक कामहरू पनि गर्दै आउनुभएको छ । उहाँले वाणिज्यशास्त्रमा स्नातक गर्नुभएको छ ।

सन् १९९५ मा स्थापना भएको बीवाईडी एक उच्च–प्रविधि कम्पनी हो, जसले प्रविधि र नवप्रवर्तनको क्षेत्रमा काम गर्दै आइरहेको छ । ६ महादेशमा ३० भन्दा बढी औद्योगिक पार्कहरू स्थापना गरेको बीवाईडीले इलेक्ट्रोनिक्स, अटोमोबाइल, नवीन ऊर्जा र रेल यातायातसम्बन्धी उद्योगहरूमा काम गर्दै आएको छ । हङकङ र शेन्जेन स्टक एक्सचेन्जमा सूचीकृत यस कम्पनीको वार्षिक कारोबार २०० आरएमबी अर्बभन्दा बढी छ ।

र्हेनुहोस् भिडिओ–