अटो व्यवसायलाई राष्ट्रबैंकको अंकुश

काठमाडौं– नेपाल राष्ट्र बैंकले सवारी साधनको ऋण लगानीमा फेरी अंकुस लगाएको छ। डेढ बर्षअघिको मौद्रिक नीतिले पहिलो पटक निजी सवारी साधनमा जाने ऋणमा अंकुस लगाएको थियो।

राष्ट्र बैंकले मंगलबार निर्दशन जारी गर्दै निजी सवारी साधनमा त्यसको मूल्यको ५० प्रतिशत मात्र ऋण दिन पाउने ब्यवस्था गरेको हो ।

विगतमा ९० प्रतिशतसम्म बैंकहरुले ऋण दिए भनेर राष्ट्र बैंकले ५० प्रतिशतमा झारेको थियो। सवारी साधनलाई कसेपछि सरकारी राजश्व नै प्रभावित भएकाले पछि त्यसको सीमा ६५ प्रतिशत पुर्याइएको थियो।

अब ५० लाखको गाडी किन्नु परे खरीदकर्ताले २५ लाख रुपैयाँ आफैले हाल्नु पर्छ। बाँकी २५ लाख बैंकले ऋण दिन्छ।

उच्च आयातका कारण सरकारको चालु खाता घाटा बढिरहेको छ। साथै शोधनान्तर पनि घाटा हुन थालेको छ। बढ्दो चालु खाता घाटा र विदेशी मुद्राको स्टक घट्दै गएपछि राष्ट्र बैंकले आयात निरुत्साहित गर्न ऋणको सीमा ५० प्रतिशतमा झारेको हो।

राष्ट्र बैंकले विद्युतीय सवारी साधन कर्जालाई भने छोएको छैन। ८० प्रतिशतसम्म ऋण पाइन्छ। ४० सीटे सार्बजनिक यातायातको सीमालाई पनि यथावत राखिएको छ।