अब प्रधानमन्त्री बालुवाटारबाट उडेरै एयरपोर्ट जान सक्ने

काठमाडौं, कात्तिक २८ –  प्रधानमन्त्री निवास बालुवाटारमा हेलीप्याड बनेसँगै अब प्रधानमन्त्री बालुवाटार बाट सिधै एअरपोर्ट जान सक्ने भएका छन् ।

योसँगै प्रधानमन्त्री एयरपोर्ट जाँदा–आउँदा ट्राफिक जामबाट सर्वसाधारणले सास्ती खेप्नु नपर्ने भएको छ। प्रधानमन्त्री निवास बालुवाटारमा अत्याधुनिक हेलिप्याड निर्माण भएसँगै उक्त समस्या समाधान हुने प्रधानमन्त्रीका प्रेस सल्लाहकार सूर्य थापाले जानकारी दिए।

थापाका अनुसार नागरिक उड्डयन प्राधिकरणको मापदण्डअनुसार बालुवाटारमा हेलिप्याड निर्माण कार्य सम्पन्न भएको छ। प्रधानमन्त्री केपी शर्मा ओलीले नेपाली सेनाको हेलिकप्टरबाट आइतवार संखुवासभाका विभिन्न कार्यक्रममा सहभागी हुन नवनिर्मित हेलिप्याडबाट नै पहिलो उडान गरेका थिए। साँझ निवास फर्किँदा पनि बालुवाटारकै हेलिप्याडमै अवतरण गरिएको थापाले बताए।