आफ्नै निर्णयबाट पछि हट्यो सरकार ,भोलि र पर्सि उपत्यका बाहिर जान नदिइने

काठमाडौं,चैत २७ -लकडाउनका कारण काठमाडौं अड्किएर बसेका नागरिकलाई शुक्रबार र शनिबार काठमाडौं उपत्यका बाहिर जान दिने विषयमा गरेको निर्णयबाट सरकार पछि हटेको छ । प्रदेश सरकार र यातायात व्यावसायीको विरोधपछि सरकार आफ्नो निर्णयबाट पछि हटेको हो ।

यसका लागि गृहकार्य गर्न गृह मन्त्रालयलाई भनिएको भएता पनि गृह मन्त्रालयले भोलि र पर्सि नै पठाउन सम्भव नभएको राय दिएपछि निर्णय उल्टिएको हो ।

सरकारले केहि घण्टा अघि लकडाउन जारी रहेकै बेला भोलि र पर्सी काठमाडौंबाट बाहिरिनेहरुका लागि जान दिने र काठमाडौं आउन भने नदिने निर्णय गरेको थियो ।

उच्चस्तरी समन्वय समितिका संयोजक उपप्रधान तथा रक्षामन्त्री इश्वर पोखरेलले यस विषयमा बैठकमा केही सदस्यहरुले कुरा उठेको भए पनि आधिकारिक निष्कर्षमा पुगेर निर्णय भइनसकेको बताए ।

‘यस्तो छ विज्ञप्ती

यस किसिमको कुनै निर्णय नभएको, कोभिड-१९ को संक्रमणबाट राष्ट्रलाई बचाउनुपर्ने आवश्यकतालाई गंभीरताका साथ महसूस गरी ‘वन्दावन्दी’ (लक डाउन ) लाई जारी राखिएको, सम्माननीय प्रधानमन्त्री ज्यूले देशवासीहरूका नाममा हालै गर्नुभएको संवोधनमा समेत यसको आवश्यकतालाई गंभीर रूपमा उठाइएको कुरा हामी सबैले सुनेका बुझेका छौं ।

यो कामलाई सरकारले मात्र नभएर आम नेपाली नागरिकहरूको पनि त्यत्तिकै महत्वका साथ लिनुपर्ने आवश्यकता छ । यस्तो गंभीर परिस्थितिमा त्यस किसिमको निर्णय कसरी हुनसक्छ रु जेसुकै कारणले भए पनि सार्वजनिक गरिएको उक्त समाचारमा सत्यता नभएको जानकारी गराउँदछु ।
– ईश्वर पोखरेल
संयोजक
कोभिड-१९’ रोकथाम तथा नियन्त्रण उच्चस्तरीय समन्वय समिति