उद्योगपति विनोद चौधरी कोरोना संक्रमणमुक्त

काठमाडौं, भदौ २१ – सांसद एवं उद्योगपति विनोद चौधरी पनि कोरोना संक्रमणमुक्त हुनुभएको छ । आज (शनिबार) ट्वीट गर्दै सांसद चौधरीले कोरोना संक्रमणमुक्त भएको जानकारी गराउनुभएको हो ।

उहाँलाई १० दिन अगाडि मात्रै कोरोना संक्रमण भएको थियो । आज गरिएको पीसीआर परीक्षणमा उहाँको रिपोर्ट नेगेटिभ आएको हो ।

उहाँले ट्वीट गर्दै भन्नुभएको छ, ‘तपाईहरुको उत्कृष्ट माया र प्रेरणाले मलाई १० दिनसम्मको एकान्तवासमा ठूलो उर्जा दियो । त्यही उर्जाकै कारण म आज कोरोनाको संक्रमणमुक्त भएको छु ।’

त्यस्तै, उहाँले थप्नुभएको छ, ‘मैले जीवनमा तपाईहरुजस्ता आफन्त, इष्टमित्र, साथीभाई र शुभेच्छुक कमाएको रहेछु । यस अर्थमा म आफूलाई अत्यन्तै भाग्यमानी महसुस गर्छु । यहाँहरुको यस्तै माया पाइरहुँ, धन्यबाद ।’