काठमाडौंमा ‘मिसेस नेपाल वर्ल्ड’ आयोजना हुँदै

काठमाडौं – विवाहित महिलाको लागि नेपालकै सबैभन्दा ठूलो प्रतियोगिता ‘मिसेस नेपाल इन्टरनेसनल’ नामक सौन्दर्य प्रतियोगिता यस वर्षदेखि ‘मिसेस नेपाल वर्ल्ड’को रुपमा आयोजना हुन लागेको छ । सो प्रतियोगिता हरेक वर्ष रिबन इन्टरटेनमेन्टले आयोजना गर्दै आइरहेको छ ।  सन् २०१९ मा मिसेस नेपाल इन्टरनेसनलको पाँचौ संस्करण सम्पन्न गरेको र सन् २०२० मा कोरोनाको महामारीका कारण स्थगित हुन गएको कार्यक्रम यस वर्षदेखि परिमार्जित भई मिसेस नेपाल वर्ल्डको रूपमा आयोजन हुन लागेको रिबन इन्टरटेनमेन्टले जनाएको छ । यस वर्ष मिसेस नेपाल वर्ल्डको पहिलो संस्करणको घोषणासंगै यस कार्यक्रमको बिजेताले सन् २०२२ को जनवरीमा लस भेगास, अमेरिकामा आयोजना हुने मिसेस वर्ल्डमा नेपालको तर्फबाट प्रतिनिधित्व गर्ने छिन्। यस वर्षदेखि रिबनले आयोजना गर्ने कार्यक्रममा एकै मन्चबाट मिसेस नेपाल वर्ल्ड र मिसेस नेपाल इन्टरनेसनलका साथै एमएस नेपाल इन्टरनेसनल गरी तीन जना बिजेताहरुको छनोट गर्नेछ। यसैगरी मिसेस इन्टरनेसनल नेपाल तथा एमएस नेपाल इन्टरनेसनलका विजेताले नेपाललाई प्रतिनिधित्व गरी सन् २०२२ मा सिङ्गापुरमा आयोजना हुने मिसेस इन्टरनेसनल तथा एमएस इन्टरनेसनलमा सहभागिता जनाउने छन्। यो वर्ष मिसेस वर्ल्डमा नेपालको पहिलो सहभागिता हुनेछ।

विगतको वर्षहरुमा झैँ सामाजिक मुद्दालाई आफ्नो कार्यक्रमको नारा तथा वर्षभरी बिजेताले उक्त मुद्दामा केन्द्रित रही काम गर्नुपर्ने हुँदा यस वर्षलाई मिसेस नेपालले क्यान्सर विरुद्धको जनचेतना अभियानलाई वर्षको मुद्दा बनाएको छ। यस अघि सम्पन्न मिसेस इन्टरनेसनलमा सबिता लामिछाने, अनुपमा राई, सुरुची पाण्डे, चन्दा थापा गिरी र भाविषा कोइराला चटौतले क्रमसस् उपाधी जितेका थिए। मिसेस इन्टरनेसनलमा यसअघि नेपालबाट सुरुचि पाण्डे, एलाईजा महर्जन, चन्दा थापा गिरीका साथै स्नेहा थापाले प्रतिनिधित्व गर्दै विभिन्न उपाधीहरु जित्दै नेपाल र नेपालीको प्रतिष्ठा बढाएका छन्। मिसेस नेपाल इन्टरनेसनल २०१८ कि बिजेता चन्दा थापा गिरीले मिसेस इन्टरनेसनलमा  मिसेस एशिया प्यासिफिक २०१८ को ताज जित्न सफल भएकी थिईन्। यसैगरि एमएस इन्टरनेसनलमा नेपालकोतर्फबाट संगिता बस्याल ले सहभागिता जनाएकी थिईन्। कार्यक्रम सम्बन्धि विस्तृत जानकारी तथा कार्यक्रमको तालिका छिट्टै नै पत्रकार सम्मेलनको आयोजना गरी जानकारी गराइने आयोजक संस्था रिबन इन्टरटेनमेन्टले विज्ञप्तिमार्फत् जनाएको छ।