खुकुरी प्रहार गरी ५० वर्षीया महिलाको हत्या

काठमाडौँ, भदौ २८ –  उदयपुरको कटारीमा ५० वर्षीया एक महिलाको खुकुरी प्रहार गरी हत्या भएको छ ।

जिल्ला प्रहरी कार्यालय उदयपुरका अनुसार कटारी नगरपालिका-११ लखनथुम्का बस्ने ५० बर्षीय डोर कुमारी राउतको खुकुरी प्रहारबाट हत्या भएको हो ।

प्रहरीले हत्याको आरोपित स्थानीय २५ बर्षीय बिनोद भन्ने रोशन राना मगरलाई पक्राउ गरेको छ । शनिवार बिहान ८:३० बजेको समयमा घरमा नै बसीरहेकी राउतलाई उनकै घरमा आई मगरले एक्कासी लछार पछार गरेका स्थानीयको भनाइ छ ।

साथै मगरले आफूसँगै बोकेर ल्याएको खुकुरीले शरिरका बिभिन्न ठाँऊमा अन्धाधुन्द प्रहार गर्दा राउतको घटनास्थलमा नै मृत्यु भएको प्रहरीको भनाइ छ ।

घटनाको जानकरी पाएलगत्तै इलाका प्रहरी कार्यालय कटारीबाट खटिएको प्रहरी टोलीले हत्या पछि फरार रहेका मगरलाई कटारी नगरपालिका -११ हात्तीसुँडे स्थित जङ्गलबाट बिहान ११ बजेतिर नियन्त्रणमा लिएको हो ।

घटनाका सम्बन्धमा अन्य थप अनुसन्धान भइरहेको इलाका प्रहरी कार्यालय कटारीले जनाएको छ ।