‘गोकर्णेश्वरका धार्मिक तथा सांस्कृतिक सम्पदा’ सार्वजनिक

काठमाडौं, कात्तिक ३० – गोकर्णेश्वर नगरपालिकाले नगर क्षेत्रभित्र रहेका पुरातात्विक, धार्मिक, सांस्कृतिक र ऐतिहासिक दृष्टिले महत्वपूर्ण सम्पदाको परिचय दिने पुस्तक ‘गोकर्णेश्वरका धार्मिक तथा सांस्कृतिक सम्पदा’ प्रकाशन गरेको छ । 

राज्य पुनर्संरचना भई तीन तहको सरकार बनेपछि स्थानीय सरकारका तर्फबाट आफ्नो क्षेत्रभित्रका सांस्कृतिक सम्पदाको परिचय पुस्तिका प्रकाशन गर्ने गोकर्णेश्वर नै पहिलो भएको नगर प्रमुख सन्तोष चालिसेले दाबी गरे । पुस्तक लोकार्पणका अवसरमा उनले धार्मिक दृष्टिकोणले गोकर्णेश्वर महत्वपूर्ण रहेको बताए । 

नगरपालिकाभित्रका धार्मिक केन्द्रको विकास एवं विस्तारलाई नगरपालिकाले उच्च प्राथमिकता दिएको जनाएको छ । नगर उपप्रमुख शान्ति नेपालले नगरपालिकाको वास्तविक पहिचान नै यहाँका धार्मिक धरोहर भएको बताए । संस्कृतिविद् प्रा डा ऋषिराम पोखरेल, वरिष्ठ साहित्यकार तथा पत्रकार विजय चालिसे, वरिष्ठ साहित्यकार गोविन्दप्रसाद घिमिरे ‘वेदमणि’ लगायतका वक्ताले संस्कृति तथा साहित्यको विकासविना समृद्ध नगरको परिकल्पना गर्न नसकिने बताए ।