चीन र इरानबीच २५ वर्षे व्यापार सम्झौता

काठमाडौं, १५ चैत – चीन र इरानले २५ वर्ष लामो सम्झौतामा हस्ताक्षर गरेका छन् ।

चिनियाँ विदेशमन्त्री वाङ यी र इरानी विदेशमन्त्री मोहम्मद जाबद जरिफबीच शनिबार हस्ताक्षर भएको हो । 

मध्यपूर्वी मुलुकको दुई दिने भ्रमणमा रहेका चिनियाँ विदेशमन्त्री वाङले इरानमा उक्त सम्झौता गरेका हुन् । यस क्रममा वाङले इरानी राष्ट्रपति हसन रौहानीसँग पनि भेटवार्ता गरे । चिनियाँ राष्ट्रपति सी जिनपिङ २०१६ मा इरान भ्रमणमा रहेका बेलादेखि नै उक्त सम्झौता सक्रिय रहँदैआएको थियो ।

यसपटकको सम्झौता अनुसार द्वीपक्षीय व्यापार आगामी दशकसम्म १० गुणा बढाएर ६०० बिलियन पुर्‍याउने सहमति भएको छ। तर दुई देशबीच भएको सम्झौताबारे सरकारले औपाचरिक रुपमा प्रकाशन गरेको छैन । यद्यपि सैन्य सहयोगका साथै उर्जा, भौतिक पूर्वाधार लगायत प्रमुख क्षेत्रमा लगानी गर्ने चिनियाँ रणनीतिक सम्झौताको रुपमा पनि यसलाई व्याख्या गरिएको छ ।

अमेरिकाले चीन र इरान दुबै देशमाथि प्रतिबन्ध लगाएपछि यस सम्झौता गरिएको बताइएको छ । अमेरिकी निवर्तमान राष्ट्रपति डोनल्ड ट्रम्पले लगाएका प्रतिबन्ध फिर्ता लिन जो बाइडेन पनि तयार देखिएका छैनन् । चीन र रुसले भने प्रतिबन्ध हटाएर सम्झौता कायम गर्न आग्रह गर्दैआएका छन् ।

चीनसँगको सम्झौतापछि इरानी राष्ट्रपतिले आर्थिक र व्यापार सहायताका साथै आतंकवाद र अतिवादविरुद्ध लड्न चीनसँग मिलेर अघि बढ्न सकिने प्रतिक्रिया दिएका थिए । चीन र इरानबीच ५० वर्ष लामो औपचारिक कुटनीतिक सम्बन्ध रहँदैआएको छ ।