चुरे मास्न लाग्यो भनेर गलत प्रचार गरियो त्यसको पछि नलाग्न अर्थमन्त्रीको आग्रह

काठमाडौं, जेठ २६ – अर्थमन्त्री विष्णु पौडेलले चुरेबाट एक डोको माटो र ढुंगा नबेच्ने स्पष्ट पारेका छन् ।आज वातावरण पत्रकार समूहले गरेको भर्चुअल मिटिङमा सो कुरा बताएका हुन् । सरकारले शनिबार ल्याएको बजेटमा व्यापार घाटा न्यूनीकरण गर्न खानीजन्य ढुङ्गा, गिटी र बालुवा निर्यात गर्ने उल्लेख भएकोमा टिप्पणी बढेकोप्रति अर्थमन्त्री पौडेलले सो बुँदामा कहिँकतै चुरे उल्लेख नभएको प्रष्ट पारे ।

अर्थमन्त्रीले देशको सार्वभौम र वातावरणजस्तो संवेदनशील विषयमा जथाभावी नबोल्न पनि आग्रह गरेका छन् । ‘चुरेमा रहेको सिद्धबाबा पहाडलाई समतल बनाएर गिटी बालुवा उत्खनन् गर्ने कुरा जसरी बाहिर गरिएको छ त्यो सरासर गलत हो । त्यसको लागि पछि नलाग्न आग्रह गर्दछु’, उनले भने ।

चुरेको काखमा रहेको क्षेत्रबाट आफू जनप्रतिनिधि भएर आएकाले पनि चुरे संरक्षणमा कुनै कसर बाँकी नराख्ने पौडेलको प्रतिवद्धता थियो ।प्राकृतिक सम्पदाको दोहन गर्ने कामको सरकारले संरक्षण नगर्ने भन्दै अहिले चुरे मास्न लाग्यो भनेर गलत प्रचार भइरहेको उल्लेख गरे । खानी उत्खनन् गर्दा व्यवस्थित तरिकाले गर्नुपर्ने विज्ञको सुझावलाई मनन गर्ने र जति सक्दो व्यवस्थापकीय क्षमतालाई उन्नत गर्दै अघि बढ्ने उन अर्थमन्त्री पौडेलको भनाइ थियो ।

कार्यक्रममा भूगर्भविद् मेगराज धितालले भौगोलिक बनावटलाई ख्याल गरेर वैज्ञानिक ढंगले खानी उत्खनन् गर्न कुनै समस्या नहुने बताए । उनले अहिले नेपालमा जथाभावी रूपमा कुनै वैज्ञानिक ढंगबिना नै उत्खनन् गरिरहेकाले समस्या निम्तिएको उनको भनाइ थियो ।

विकसित देशमा पनि खानीजन्य पदार्थ उत्खनन गरी अन्य मुलुकमा बिक्री हुने गरेको उदाहरण दिँदै धितालले यसलाई व्यवस्थित गर्न जोड दिए ।चुरे विकास समितिका अध्यक्ष डा. किरण पौडेलले चुरे संरक्षणमा चुनौती थपिएको बताउँदै सरकारले अहिले ल्याएको कार्यक्रममा चुरेबाट नै बालुवागिटी निकास गर्ने भनेर नलेखिएको स्पष्ट पारे ।