छालाका वस्तु निर्यातमा उच्च गिरावट

काठमाडौं – व्यापार प्रवर्द्र्धन गर्ने उद्देश्य अनुरुप एकिकृत व्यापार रणनीतिमा राखेका बस्तुहरुको निर्यात ओरालो लागेको छ ।

विभिन्न १० बस्तुलाई निर्यातको उच्च प्राथमिकतामा राखे पनि ठिक त्यसको विपरित ती बस्तुहरुको निर्यात घटेको छ ।

सरकारले निर्यातको प्राथमिकतामा राखेको बस्तुमध्ये गत आर्थिक बर्षको पहिलो ४ महिनाको तुलनामा चालू आबको सोही अबधिमा छाला र छाला जुत्ताको निर्यातमा उच्च गिरावट आएको छ ।

व्यवसायीहरुले उच्च लविङ गरेर छाला तथा जुत्तालाई एकिकृति व्यापार रणनीतिको सूचीमा राखेपनि सोही अनुरुप निर्यात गर्न सकेका छैनन् ।

गत आबको ४ महिनाको तुलनामा छाला निर्यात ५७ दशमलव ५ प्रतिशतले घटेको छ र जुत्ता निर्यातमा १८ दशमलव ७ प्रतिशतले गिरावट आएको छ ।

सरकारले बार्षिक १ अर्ब रुपैयाँ भन्दा बढीको निर्यात गर्ने लक्ष्य अनुरुप एनटीआईएसको सूचीमा राखेपनि ४ महिना वित्दा जम्मा १३ करोड रुपैयाँ बराबरको मात्र छाला निर्यात भएको छ ।