ठेक्का सम्झौताको दुई वर्षपछि कोटेश्वर–कलङ्की सडकमा तीन आकासे पुलको काम सुरु

काठमाडौं, २७ माघ – ठेक्का सम्झौता भएको दुई वर्षपछि चक्रपथको कोटेश्वर–कलङ्की खण्डमा तीन आकासे पुलको निर्माण काम सुरु हुन लागेको छ । ६ स्थानमा आकासे पुल निर्माण सुरु गरिएकामा यी तीन स्थानमा डिजाइनमा नै समस्या भएकाले विगतका वर्षहरुमा निर्माण हुन नसकेको काठमाडौँ चक्रपथ सुधार योजनाले जनाएको छ । 

चीन सरकारको आर्थिक सहयोगमा निर्माण भएको सो सडकमा नेपाल सरकारले एक–एक किलोमिटरको दूरीमा पर्ने गरी ६ स्थानमा आकासेपुल निर्माण सुरु गरेको थियो । महालक्ष्मीस्थान, बल्खु र सानेपामा अहिले यी पुलको डिजाइन सच्याएर निर्माण अघि बढाइरहेको योजनाका प्रमुख अर्जुन सुवालले बताए । 

उनका अनुसार निर्माण व्यवसायीका कारणले नभएर यी पुल निर्माण सडक विभाग र योजना कार्यालयकै कारण ढिलाइ भएको हो । यी पुलको निर्माण एउटै कम्पनीमार्फत भइरहेको छ । 

डिजाइनको समस्या हटाइएकाले अब लामो समय नलाग्ने उनले बताए । गत महिनामा अवधि सकिएको भए पनि पुल निर्माणमा थप ६ महिना थपिएको छ । उनले भने, ‘असार मसान्तसम्ममा नै पुल निर्माण भइसक्ने देखिएको छ ।’ यसअघि नै सातदोबाटो, बालकुमारी र एकान्तकुनामा पुल निर्माण सम्पन्न भएर प्रयोगमा आइसकेको छ । 

चीन सरकारको सहयोगमा निर्माण भएको सो सडकमा पहिले तीन स्थानमा मात्रै आकाशे पुल निर्माण गर्ने गरी डिजाइन तयार भएको थियो । सोही आधारमा चिनियाँ कम्पनीले कोटेश्वर, ग्वार्को र बागडोल गरी तीन स्थानमा पुलको निर्माण गरेको थियो । आठ लेन चौडाइको सो सडकमा सवारी साधनको गति उच्च हुने भएकाले पैदल यात्रुका लागि थप आकासे पुलको आवश्यकता भएको भन्दै विभागले थप ६ स्थानमा पुल निर्माण अघि बढाएको थियो । 

चीन सरकारले सडक हस्तान्तरणपछिको एक वर्ष मर्मत अवधि चलिरहँदा विभागले पुल निर्माण सुरु गरेको थियो । चक्रपथको पहिलो खण्डमा कम सङ्ख्यामा पुल भएकाले समस्या भएकाले विभागले विस्तारको क्रममा रहेको चक्रपथको दोस्रो खण्ड (कलङ्कीबाट गोपीकृष्ण हल अगाडिसम्म) प्रत्येक एक किमिमा एउटा आकासे पुलको प्रस्ताव गरेको छ । झण्डै १० किमि लम्बाइको सडकमा नौ आकासे पुल निर्माण गर्ने गरी डिजाइन भएको छ ।