नागरिक स्टक डिलरको प्रमुखमा २ जनाको सर्टलिष्ट

काठमाडौं, असोज १२ – नागरिक स्टक डिलर कम्पनीको प्रमुख कार्यकारी अधिकृतका लागि २ जनाको नाम सर्टलिष्ट भएको छ । नागरिक लगानी कोषको सहायक कम्पनीको रुपमा पुँजीबजारमा स्टक डिलरको काम गर्ने अनुमति पाएको सो कम्पनीको कार्यकारी प्रमुखका लागि महेश्वरलाल श्रेष्ठ र सन्तोषराज नेपालको नाम छनौट भएको प्रमुख कार्यकारी अधिकृत छनौट उपसमितिले जनाएको छ । 

यसअघि कोष सञ्चालक समितिले शंकरकुमार रायामाझीको संयोजकत्वमा डा. खगेन्द्र सुवेदी र झइन्द्रप्रसाल गुरागाइँ सम्मिलित समिति गठन गरेको थियो । 
छनौटमा परेका दुई जनामध्ये श्रेष्ठ राष्ट्र बैंकका अवकाशप्राप्त कार्यकारी निर्देशक हुन् । उनले २०७६ जेठमा राष्ट्र बैंकको ३० वर्षे सेवाबाट अवकाश पाएका थिए । अवकाश पाउनुअघि उनी नेपाल राष्ट्र बैंकको सुपरीवेक्षण विभागमा लामो समय काम गरेका थिए । 

नेपाल भने पुँजी बजारसम्वद्ध संस्थामा आवद्ध भएका व्यक्ति हुन् । आफ्नो आवेदनमा उनले तत्कालिन ग्रोमोर मर्चेन्टमा कार्य गरेको अनुभव रहेको उल्लेख गरेका छन् । दुवै जनालाई असोजन १७ गते बिहान आफ्नो प्रस्तुतीकरण र अन्तवार्ताका लागि बोलाइएको छ । 

५ अर्ब चुक्तापुँजीसहित कारोबार सञ्चालन गर्न लागेको उक्त कम्पनीले कारोबार सुरु गर्ने प्रक्रिया अन्तिम चरणमा पुर्याएको छ ।