नाफिजको अध्यक्षमा द राइजिङ नेपालका मोदनाथ ढकाल चयन, बन्यो नयाँ कार्यसमिति

काठमाडौं, मंसिर २८ – नेपाल आर्थिक पत्रकार संघ (नाफिज)को अध्यक्षमा द राइजिङ नेपालका मोदनाथ ढकाल चयन भएका छन् । गत शनिबार सम्पन्न संघकाे पाँचौं महासभाले नयाँ अध्यक्षमा ढकाललाई चयन गरेकाे हाे ।

अर्थमन्त्री विष्णुप्रसाद पौडेलले उद्घाटन गरेको महासभाले अध्यक्षसहित १३ सदस्यीय कार्यसमिति चयन गरेको हाे । यस्तै रेडियो नेपालका भुवन आचार्य र आर्थिकन्युजकी मेनुका कार्कीलाई उपाध्यक्षमा चयन भएका छन् ।

महासचिवमा कर्पोरेट नेपालका नारायण पौडेल तथा सचिवमा अनलाइनखबरका रोयल आचार्य निर्वाचित भए । नाफिजका नयाँ सह-सचिव बिजपाटीका महमल अजमत अली र नोटबजारका परमेश्वर अधिकारी कोषाध्यक्ष बने ।

महासभाले नाफिजका नयाँ कार्यसमिति सदस्यमा ५ जनालाई निर्वाचित गरेको छ । जसमा आर्थिक अभियानकी प्रजिता बुढाथोकी, रोजगार मिडियाका फणिन्द्र दाहाल, बाह्रखरीका रोविन पौडेल, अनलाइनखबरका नवीन ढुंगाना र नेपालखबरका दीपक भट्ट छन् ।

यस्तै नयाँ कार्यसमितिको पहिलो बैठकले गोरखापत्र दैनिकका गोपालचन्द्र सुवेदी र क्लिकमान्डुकी दिलु कार्कीलाई कार्यसमिति सदस्यमा मनोनित गरेको छ । संस्थाका निवर्तमान अध्यक्ष सिताराम भट्टराई स्वतः कार्यसमिति सदस्य बने ।

महासभाकाे समापन सञ्चार तथा सूचना प्रविधि मन्त्री पार्वत गुरुङको प्रमुख आतिथ्यमा सम्पन्न भयो ।