नेकपा विवादबारे स्वेतपत्र जारी गर्दैछौं: प्रचण्ड

काठमाडौं, माघ २३ – नेपाल कम्युनिष्ट पार्टीको प्रचण्ड-नेपाल समूहका अध्यक्ष पुष्पकमल दाहाल ‘प्रचण्ड’ले पार्टीको विवादबारे स्वेतपत्र जारी गर्न लागेको बताएका छन्।

शुक्रबार बिहान काठमाडौंमा आयोजित एक कार्यक्रममा बोल्दै प्रचण्डले पार्टीमा भएको के हो भन्ने सबै सार्वजनिक गर्ने बताए।

‘यो पार्टीभित्रको मात्रै विवाद होइन। यो प्रतिगमनका पक्षमा र संविधानको पक्षमा भएको हमला हो। के भएको हो हामी सबै भन्नेछौं,’ प्रचण्डले भने, ‘अहिले किन नागरिक समाज, लेखक, बुद्धिजिवी प्रतिगमनको विरुद्धमा आएका छन्? उनीहरू कम्युनिष्ट होइनन्। यो देशका राम्रा दिमाग भएकाहरू प्रतिगमनका विरूद्धमा छन्।’

उनले प्रधानमन्त्री केपी शर्मा ओली पक्षले नारायणहिटी अगाडि गर्न लागेको आजको सभालाई पञ्चहरूको र्‍यालीजस्तै भएको बताए।

‘०४६ सालको आसपासमा लाखौं सडकमा आएर समेत पञ्च र्‍याली भएका थिए। त्यही भएर कसका पक्षमा कति छन् भन्नेतिर नलागौं,’ उनले भने।

संवैधानिक नियुक्ति अलोकतान्त्रिक चरित्रको पराकाष्ठा भएको प्रचण्डले भनाइ छ।

‘अध्यादेश ल्याएर हतार-हतार नियुक्ति भएको छ। सदस्यहरूलाई बोलाइएको छैन। पार्टीमा नियुक्ति गरेकै छैन भन्नुभएको थियो,’ उनले भने,’ अहिले संविधानको हत्या भएको छ। जंगली राज गरिएको छ। तपाईहरू प्रचण्ड र माधव नेपाललाई मात्र नहेर्नुस्।’

उनले ओलीको त्यही कदमको विरोधको प्रतिवादस्वरूप हिजोको आमहड्ताल आवश्यक भएको बताए।  केही समयपछि जनताहरू आएर हप्तौं हड्ताल हुनसक्ने  प्रचण्डको भनाइ छ।

‘हामी सधैँ बन्द हडताल गर्ने होइन। हिजो नागरिकलाई परेको समस्यामा हामी दु:खी छौं। अब जनता आएर हप्तौं हड्ताल हुनसक्छ। तर हामी अहिले नै हड्ताल हुन्छ भन्दैनौं। हिजोको हड्ताल जरूरी थियो,’ उनले भने।