नेपालमा एकै दिन ४ हजार जना भन्दा बढीमा कोरोना संक्रमण पुष्टि, १८ जनाको मृत्यु

काठमाडौं, १४ वैशाख । नेपालमा पछिल्लो २४ घण्टामा कोरोना भाइरसका ४ हजार ५२४ जना नयाँ संक्रमित थप भएका छन् ।

बितेको २४ घण्टामा देशभर १४ हजार ६७२ जनाको आरटी–पीसीआर गर्दा ४ हजार ३६४ जना र १ हजार ९ जनाको एन्टिजेट परीक्षण गर्दा १६० जना गरी कुल ४५२४ जनामा संक्रमण पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या ३ लाख ७ हजार ९२५ जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ५५५ जना संक्रमित निको भएर अस्पतालबाट डिस्चार्ज भएका छन् । यो सँगै नेपालमा कोरोना भाइरसको संक्रमण निको हुनेको संख्या २ लाख ७८ हजार ५०६ जना पुगेको छ ।

पछिल्लो २४ घण्टामा १८ जना संक्रमितको मृत्यु भएको छ । यो सँगै हालसम्म नेपालमा कोरोना भाइरसको संक्रमणबाट मृत्यु हुनेको संख्या ३ हजार १९४ जना पुगेको छ ।

हाल देशभर सक्रिय संक्रमितको संख्या २६ हजार २२५ जना छ ।

मन्त्रालयका अनुसार हालसम्म नेपालमा २४ लाख ३२ हजार ८९ जनाको पीसीआर विधिबाट स्वाब परीक्षण गरिएको छ भने अहिले २६ हजार २२५ जना आइसोलेसन र ५८ जना क्वारेन्टिनमा छन् ।