फेसबुकले बालबालिकालाई हानि पुर्‍याउने र प्रजातन्त्र कमजोर पार्ने गरेको एक पूर्वकर्मचारीको बयान

फेसबुकमा प्रडक्ट म्यानेजरकी रूपमा काम गरेकी ३७ वर्षीया फ्रान्सिस हाउगनले सो कम्पनीका बारेमा अमेरिकी संसद् रहेको क्यापिटल हिलमा फेसबुक बारे आलोचनात्मक बयान दिएकी छन् ।

फ्रान्सिस हाउगनले अमेरिकी सांसदहरूलाई कम्पनीको साइट र एपले बालबालिकाहरूलाई नोक्सान पु–याउने, विभाजनलाई बढावा दिने र लोकतन्त्रलाई कमजोर बनाउने बयान दिएकी छन् ।

उनले त्यसबारे जान्दाजान्दै पनि कम्पनीले मुनाफालाई प्राथमिकतामा राखेको बताउदै फेसबुक आफै नसुध्रिने भन्दै अमेरिकी संसद् समक्ष कम्पनीमाथि छानबिनको लागि सहयोगको अपिल गरेकी छन् ।

यी आरोपहरूलाई खण्डन गर्दै कम्पनीका संस्थापक मार्क जकरवर्ग भन्छन ‘यी दाबीहरूको कुनै मतलब छैन । हामी मानिसको सुरक्षा, भलाई र मानसिक स्वास्थ्य जस्ता मुद्दाको बारेमा गहिरोरूपमा ध्यान दिन्छौँ ।’

२.७ अर्ब मासिक सक्रिय प्रयोगकर्ता रहेको फेसबुक विश्वकै सबैभन्दा लोकप्रिय सामाजिक सञ्जाल हो। तर पछिल्लो प्रयोगकर्ताहरूले आफ्नो प्राइभेसी कायम राख्न नसकेको र फेक न्युज र गलत जानकारीको प्रचार प्रसार रोक्न आवश्यक कदम चाल्न नसकेको भन्दै फेसबुकको आलोचना पनि गरिरहेका छन्।