बेल्जियमबाट नेपाल आएकी बागलुङकी युवतीमा कोरोना संक्रमण

काठमाडौं, चैत १५ – नेपालमा थप एक जना कोरोना संक्रमित भेटिएका छन् । योसँगै नेपालमा कोरोना संक्रमितको संख्या पाँच पुगेको छ । बेल्जियमबाट नेपाल आएकी २२ वर्षीया बागलुङकी एक युवतीमा कोरोना भाइरस (कोभिड-१९) संक्रमण पुष्टि भएको हो ।

संक्रमण देखिएकी युवती चैत ४ गते कतार एयरवेजको ‘क्यूआर ६५२’ विमानबाट नेपाल आएकी थिइन् । उनीसँगै फ्रान्सबाट नेपाल आएकी युवतीमा पनि कोरोना संक्रमण देखिएपछि अहिले टेकुस्थित शुक्रराज ट्रपिकल तथा सरुवा रोग अस्पतालमा उपचार भइरहेको छ ।

हाल उनी आफ्नै घरमा सुरक्षित रुपमा बसेको जनाइएको छ । संक्रमण पुष्टि भएकी उनलाई सुरक्षित रुपमा काठमाडौं ल्याउने तयारी भइरहेको छ ।