भारतमा ‘लकडाउन’ मे ३ सम्म लम्बियो

काठमाडौं, बैशाख २- भारतीय प्रधानमन्त्री नरेन्द्र मोदीले भारतमा ३ मे सम्म लकडाउन थपिएको बताएका छन् । मंगलबार बिहान राष्ट्रको नाममा सम्बोधन गर्दै मोदीले यस्तो घोषणा गरेका हुन् ।

भारतमा जारी रहेको तीन हप्ते लकडाउन बुधबार सकिँदै छ । मोदीले यदि लकडाउन राम्रोसँग पालना गरिए अप्रिल २० पछि केही छुट दिइने पनि बताएका छन् ।

सम्बोधनका क्रममा मोदीले लकडाउनको कारण नागरिकलाई निकै कष्ट भइरहेको बताए । साथै उनले व्यक्ति व्यक्तिबीचको दुरीले नै महामारीलाई नियन्त्रणमा लिन सकिने बताए ।

उनले लकडाउनको पूर्ण पालना गर्न र जुन ठाउँमा छौँ त्यही ठाउँमा रहन सचेत गराएका छन् । साथै उनले नागरिकसँग सात वटा बुँदामा साथ मागेका छन् ।

• वृद्धवृद्धाको विशेष ध्यान राखौँ
• व्यक्ति व्यक्तिबीचको दुरी कायम गरौँ
• प्रतिरक्षा प्रणाली बढाउने कुरामा ध्यान दिऔँ
• कोरोना सङ्क्रमण रोक्न आरोग्य सेतु मोबाइल एप डाउनलोड गरौँ
• विपन्न परिवारका लागि सकेजति सहयोग गरौँ
• आफूसँग काम गर्नेलाई कामबाट ननिकालौँ
• डाक्टर, नर्स, सरसफाइकर्मी र प्रहरीको आदर गरौँ