मण्डेकाजीलाई पिपल्स च्वाइस अवार्ड जिताउन २ लाख सहयोग

काठमाडौं, पुस २६ – नेपाल खेलकुद पत्रकार मञ्‍चको आयोजनामा म‌गलबार हुने एनएसजेएफ पल्सर स्पोर्टस अवार्डअन्तर्गत पिपल्स च्वाइस विधाको मनोनयनमा परेका भक्तपुरे खेलाडी मण्डेकाजी श्रेष्ठलाई जिताउने लक्ष्यका साथ जिल्ला खेलकुद विकास समिति भक्तपुरले २ लाख रुपैयाँ सहयोग गरेको छ।

खेल पत्रकार र विभिन्‍न खेलका मुख्य प्रशिक्षकहरुको मत, फेसबुक लाइक र खेलप्रेमीहरुले गरेको एसएमएस मतका आधारमा पिपल्स च्वाइस विधाको विजेता चयन हुने प्रावधान छ। 

भक्तपुर जिल्लाको मध्यपुर नगरपालिका निवासी कराते खेलाडी श्रेष्ठले गत वर्ष नेपालमै सम्पन्‍न १३औं दक्षिण एसियाली खेलकुद (साग)  मा देशका लागि दोहोरो स्वर्ण पदक जितेका थिए।

मनोनयनमा परेपछि उनलाई जिताउने अभियानमा सहयोगका लागि जिल्ला खेलकुद विकास समिति भक्तपुरका अध्यक्ष श्रीभक्त कासिछवाको संयोजकत्वमा विभिन्‍न संस्था तथा व्यक्तिबाट उक्त सहयोग रकम जुटाइएको राष्ट्रिय खेलकुद परिषदले जनाएको छ। अध्यक्ष कासिछवाले आज एक समाराेहका बीच खेलाडी श्रेष्ठलाई सहयोग रकम हस्तान्तरण गरेका थिए।