राष्ट्रपति बाइडेनले पुनः भ्रमण प्रतिबन्ध लागू गर्ने

काठमाडौं, माघ १३- अमेरिकी राष्ट्रपति जोय बाइडेनले सामेबार कोभिड–१९ संक्रमण नियन्त्रण तथा रोकथामका लागि अमेरिका भ्रमणमाथि लगाइने प्रतिबन्धमा हस्ताक्षर गर्ने कार्यक्रम रहेको राष्ट्रपति भवन ह्वाइट हाउसका अधिकारीहरूले आइतबार पुष्टि गरेका छन् । यस प्रतिबन्धले यदि हालसालै दक्षिण अफ्रिकामा रहेका अधिकांश गैर अमेरिकी नागरिकहरूले अमेरिकामा प्रवेश गर्न नपाउने भएका छन् ।

दक्षिण अफ्रिकामा हालै मात्र नयाँ अर्थात् विकसित रूपको कोरोना भाइरस फेला परेको थियो । कोरोना भाइरसको कारण अमेरिकामा मात्र २ करोड ५० लाखभन्दा बढी व्यक्ति संक्रमित हुनाका साथै ४ लाख १८ हजार जनाभन्दा बढीको ज्यान गइसकेको छ ।

साथै, बाइडेनले गत वर्षको अधिकांश समय कोरोना भाइरस रोकथामका लागि लागू गरिएका व्यापक प्रतिबन्धहरू पुनः कार्यान्वयन गर्ने अपेक्षा गरिएको छ । ती प्रतिबन्धहरू पूर्वअमेरिकी राष्ट्रपति डोनाल्ड ट्रम्पले आफ्नो कार्यकाल सकिनु केही दिनअघि मात्र फुकुवा गरेका थिए ।

पुनः लागू गरिने भ्रमण प्रतिबन्धले संयुक्त अधिराज्य, आयरल्यान्ड, तथा स्केन्जेन मुलुकका रूपमा चिनिने थुप्रै युरोपेली मुलकका गैरअमेरिकी नागरिकलाई असर पार्ने बताइएको छ । साथै, ब्राजिलबाट अमेरिका आउन चाहनेहरूलाई पनि यसले प्रभाव पार्ने बताइएको छ ।

बाइडेनले राष्ट्रपतीय कार्यभार सम्हाल्नुअघि नै ह्वाइट हाउसका प्रेसमन्त्री जेन साकीले ट्विटरमार्फत आफैंले लागू गरेका प्रतिबन्धहरू फुकुवा गर्ने ट्रम्पको निर्णयको आलोचना गरेकी थिइन् । साकीले महामारीको रूप झन्झनै खतरनाक हु“दै गइरहेका बेला तथा अझै डरलाग्दो र छिटो सर्ने खालका नयाँ भाइरस देखिरहेका बेला अन्तर्राष्ट्रिय भ्रमण प्रतिबन्ध हटाउनु उचित नरहेको दाबी गरेकी थिइन् । यी प्रतिबन्धहरू मंगलबारदेखि हट्नेगरी ट्रम्पले निर्णय गरेका थिए ।