शैक्षिक परामर्श मेला आज सकिदै, विद्यार्थी तथा अभिभावकको घुइँचो

काठमाडौं – राजधानीमा जारी १२ औं राष्ट्रिय शैक्षिक परामर्श (ईक्यान) मेला आइतबार सकिदै छ ।

साउन ३ गतेदेखि सुरु भएको मेलामा अवलोकन गर्न आउने विद्यार्थी र अभिभावकको घुइँचो बढेको छ ।

मेला अवधिभरमा करिब १ लाखभन्दा बढीले अवलोकन गरी वैदेशिक उच्च शिक्षाका लागि राय, परामर्श लिन सक्ने लक्ष्य लिइएको आयोजक संस्था नेपाल शैक्षिक परामर्श संघ (ईक्यान) का उपाध्यक्ष राजेन्द्र रिजालले बताएका छन् ।

उनका अनुसार ईक्यान मेलामा विद्यार्थी र अभिभावकहरुले विशेष चासो, उत्सुकता र जिज्ञासाका साथ परामर्श लिइरहेका छन् ।

मेलामा रहेका २२८ वटा शैक्षिक परामर्शदातृ संस्थाका स्टलबाट परामर्शदाताहरुले सेवा दिइरहेका छन् ।

मेलामा अष्ट्रेलिया, यूरोप, जापान, अमेरिका, क्यानाडा, कोरिया, मलेशिया, फिलिपिन्स, भारत लगायत देशको शिक्षा नीति, शैक्षिक कार्यक्रम, यूनिभर्सिटी, कलेज र विषयहरुका बारेमा सम्पूर्ण जानकारी लिन सकिन्छ ।