हामी छिमेकी मुलुक विरुद्ध एकअर्काको कार्ड खेल्दैनौं : प्रधानमन्त्री ओली

काठमाडौं ।   प्रधानमन्त्री एवं परराष्ट्रमन्त्री केपी शर्मा ओलीले नेपालले दुई छिमेकी मुलुक चीन र भारतविरुद्ध एकअर्काको कार्ड नखेल्ने प्रष्ट पारेका छन् । परराष्ट्र मामिला अध्ययन प्रतिष्ठानको कार्यक्रममा शुक्रबार बोल्दै उनले नेपालले इमान्दार र सन्तुलित सम्बन्ध चाहेको बताए ।

नेपालले ‘सार्वभौम समानता’को परराष्ट्र नीति आत्मसात गरिरहेको बताउँदै प्रधानमन्त्रीले यो नीतिले छिमेकीसँगको असमझदारी समेत हटाउने बताए । ‘हामी छिमेकीसँग सन्तुलित सम्बन्ध बनाउन चाहन्छौं । हामी कूटनीति भनेर चलाखीले काम लिन चाहँदैनौं’ उनले भने ।

विदेशी मित्रराष्ट्रसँग जुध्ने भन्दा मित्रताको नीति लिएर अगाडि बढ्नुपर्ने बताउँदै प्रधानमन्त्री तथा परराष्ट्रमन्त्री ओलीले ‘सबैसँग मित्रता र कसैसँग पनि शत्रुता’ नचाहेको बताए । ‘विश्वमा साझा प्रयास केन्द्रित गर्ने कुरामा यो नीतिले वसुधैव कुटुम्बकमको मान्यतालाई पछ्याउँछ’ उनले भने, ‘हामी शान्तिको पक्षमा नीतिहरु तय गर्छौं । अन्तर्राष्ट्रिय सम्बन्धलाई निर्देशित गर्ने नीतिहरु हामी बनाउँछौं र हाम्रा नीति विश्वमा शान्ति छाउनुपर्छ भन्ने कुराबाट निर्देशित छन् ।’

नेपालले परराष्ट्र नीति तय गर्दा राष्ट्रिय हितलाई मात्र प्राथमिकतामा नराखेको उनको भनाई छ । ‘राष्ट्रिय हितलाई प्राथमिकतामा राख्दा न्याय र अन्तर्राष्ट्रिय उत्तरदायित्वलाई छोडियो भने राष्ट्रिय स्वार्थ केन्द्रित र संकीर्ण हुन्छ । यसले अन्तर्राष्ट्रिय भाइचारालाई समात्न सक्दैन’ उनले भने । नेपालले शान्तिपूर्ण ढंगले सबै समस्याको समाधान चाहेको बताउँदै ओलीले कोभिड महामारी नियन्त्रण र रोकथाममा नेपाल विकसित मुलुकभन्दा अगाडि रहेको बताए ।