होंगान्जी न्यु डायमण्ड र अर्थोप्लास्टबीच सहकार्य

काठमाडौं , माघ २३ – नेपाली भलिबलमा फरक पहिचान बनाउन सफल होंगान्जी न्यु डायमण्ड र खेलकुद केन्द्रित फिजियोथेरापी सेवा प्रदान गर्दै आएको अर्थोप्लास्ट रिह्याबिलिटेसन सेन्टरबीच सहकार्य सम्झौता भएको छ ।

सातदोबाटोस्थित अर्थोप्लास्टमा एक कार्यक्रमबीच होंगान्जी न्यु डायमण्डकी अध्यक्ष सुनकेशरी माली र अर्थोप्लास्टका स्वास्थ्य निर्देशक सुरज भुसालले सम्झौता पत्रमा हस्ताक्षर गरे । सम्झौता अनुसार न्यु डायमण्डले आफूले प्रयोग गर्ने जर्सी, प्रशिक्षण स्थल तथा आफ्नो प्रतियोगितामा अर्थोप्लास्टको लोगो राख्नेछ ।

त्यस्तै अर्थोप्लास्टले प्रतियोगिताका दौरान टोलीलाई फिजियो सुविधा प्रदान गर्नेछ । प्रतियोगिता बाहेक प्रशिक्षण लगायत अन्य समयमा पनि अर्थोप्लास्टले विशेष छुटसहित न्यु डायमण्डका खेलाडीलाई फिजियो सेवा दिनेछ । यसमा लाग्ने आर्थिक पाटोबारे भने दुवै पक्षले खुलाउन चाहेनन् ।

यसअघि अर्थोप्लास्टले न्यु डायमण्डलाई फिटनेस सामाग्री सहयोग गरेको थियो । त्यस्तै अर्थोप्लास्टको टोलीले न्यु डायमन्डको प्रशिक्षण स्थलमा गएर खेलाडीसँग अन्तर्क्रिया समेत गरेको थियो ।

न्यु डायमण्डकी अध्यक्ष मालीले खेलाडीको स्वास्थ्यलाई प्राथमिकतामा राख्नुपर्ने र अर्थोप्लास्ट नेपालकै उत्कृष्ट रहेकोले सहकार्य गरिएको बताइन् । निर्देशक भुसालले खेल र स्वास्थ्य एक अर्काको परिपुरक भएकाले आफ्नो संस्थाले खेललाई प्राथमिकतामा राख्दै आएको र न्यु डायमण्डसँग सहकार्यले दुवै पक्षलाई फाइदा पुग्ने विश्वास व्यक्त गरे ।

कार्यक्रममा न्यु डायमण्डका प्रशिक्षक कुमार राई, स्पाइकर प्रतिभा माली तथा अर्थोप्लास्टका रिह्याबिलिटेसन इन्चार्ज शामेद कातिलाको समेत उपस्थिति रहेको थियो ।