७ लाख लिँदै कोरियन भाषा परीक्षा दिने नक्कली परीक्षार्थी पक्राउ

काठमाडौं, पुस ८ – विभिन्न समयामा इपिएस परीक्षामा नक्कली परीक्षार्थी बनी ठगी गर्ने कार्यमा संलग्न रहेको अभियोगमा एक जना पक्राउ परेका छन्।

सुनसरी धरान उपमहानगरपालिका–१९ घर भई काठमाडौं महानगरपालिका–५ रुद्रमतीमार्ग, कालोपुल बस्ने ५१ वर्षीय उत्तममान लिम्बुलाई मंगलबार प्रहरीले पक्राउ गरेको छ।

कोरियन भाषाको प्रशिक्षकको रुपमा काम गर्ने उत्तममानले विभिन्न समयमा अर्काको नाममा कोरियन भाषाको इपिएस परीक्षा दिएका थिए।

इपिएसमा सहभागी हुन आएका विद्यार्थीहरूलाई प्रभाव तथा प्रलोभनमा पारी विद्यार्थीहरुको प्रवेश पत्रमा आफ्नो फोटो राखी परीक्षा दिई उत्तीर्ण हुने र प्रतिव्यक्ति ७ लाख रुपैयाँसम्म लिई विद्यार्थीहरुलाई कोरिया पठाउने कार्यमा वर्षौदेखि संलग्न रहँदै आएको खुल्न आएको प्रहरीले जनाएको छ।

विशेष सूचना आधारमा महानगरीय अपराध महाशाखाबाट खटिएको प्रहरीले उत्तममानलाई पक्राउ गरी आवश्यक कारबाहीको लागि महानगरीय प्रहरी परिसर, काठमाडौं पठाइएको जनाएको छ।