आफ्नै ठूलो बुबाको परिवारका ३ जनामाथि खुकुरी प्रहार गर्ने पक्राउ

काठमाडौं, असोज ८ –आफ्नै ठूलो बुबाको परिवारका तीन जनामाथि खुकुरी प्रहार गर्ने सिरिजंघा गाउँपालिका–७ याम्फुदिन भोटेगाउँका २२ वर्षीय लाक्पा शेर्पा पक्राउ परेका छन् । प्रहरीको टोलीले उनलाई बिहीबार याम्फुदिनबाटै पक्राउ गरेको प्रहरी नायब उपरीक्षक महेन्द्र श्रेष्ठले जानकारी दिए ।

पशुचौपायाका लागि घाँस–पराल राख्ने खोल्मामा सुतिरहेको अवस्थामा उनी पक्राउ परेका हुन् । उनले बुधबार राति परिवार भित्रकै ३ जनामाथि खुकुरी प्रहार गर्दा गम्भीर घाइते भएका छन् । ६१ वर्षीय ठूलीआमा फुटिक भोटे, ३६ वर्षीय दाजु पासाङ भोटे र १८ वर्षीय भाइ लाक्पाछिरिङ भोटेमाथि खुकुरी प्रहार गरेको वडाध्यक्ष टासी शेर्पाले बताए ।