नेपाल बैंकको ६०औं वार्षिक साधारण सभा सम्पन्न, शेयरधनीले २३ वर्षपछि पाए लाभांश

काठमाडौं, पुस २७- नेपाल बैंक लिमिटेडको ६० औं वार्षिक साधारण सभा शुक्रबार नेपाल एपिएफ क्लब हलचोकमा सम्पन्न भएको छ । नेपालको सबैभन्दा पुरानो बैंक नेपाल बैंक लिमिटेडले २३ वर्षपछि शेयरधनीहरुलाई लाभांस वितरण गर्ने प्रस्ताव पारित गरेको छ ।

६० औं वार्षिक साधारण सभाले सञ्चालक समितिले प्रस्ताव गरेको १५ प्रतिशत बोनस शेयर र १० प्रतिशत नगद लाभांश दिने प्रस्ताव अनुमोदन गरेपछि लगानीकर्ताले २३ वर्ष पछि लाभांश पाएका हुन् ।

बोनस शेयर पारित भएसँगै नेपाल बैंकाको चुक्ता पूँजी ११ अर्ब २८ करोड २८ लाख २० हजार २ सय रुपैयाँ पुगेको छ। साधारण सभामा शेयरधनीहरुले बैंकको खराब कर्जा अझै बढी रहेको बताउँदै त्यसलाई घटाउनु ध्यान दिन सुझाव दिएका थिए।

बैंकका अध्यक्ष बासुदेव अधिकारीले शेयरधनीहरुको प्रश्नको जवाफ दिदै खराब कर्जा घटाउन प्रयत्न गरिरहेको जानकारी दिए। उनले राष्ट्र बैंकले स्प्रेड रेट र बेस रेट घटाउन निर्देशन दिएकाले खुद ब्याज आम्दानी घटेको समेत बताए।

त्यस्तै अध्यक्ष अधिकारीले नगद लाभांश वितरण साधारण सभा सकिएको दुई घण्टापछि शुरु हुने र बोनस शेयर छिट्टै नै नेप्सेमा सुचीकरण गराई सम्बन्धित शेयरधनीलाई वितरण गरिने जानकारी दिए ।