वाणिज्य विभागको कार्वाहीका सम्बन्धमा भाटभटेनीको यस्तो स्पष्टोक्ति

काठमाडौं, बैशाख १७ – नेपाल सरकार वाणिज्य, आपूर्ति तथा उपभोक्ता संरक्षण विभागले वैशाख १५ गते गरेको कार्वाही सम्बन्धमा टंगालस्थित भाटभटेनी सुपरमार्केटले आफ्नो स्पष्टोक्ति दिएको छ ।

सुपरमार्केटले काठमाडौंको टेकुस्थित काष्ठमण्डप खाद्य उद्योग प्रालिबाट आपूर्ति गरिएको २५० ग्रामको लाखमरी प्याकेटमा बढी मूल्य लिएको भन्दै उक्त जरिवाना विभागले गरेको थियो ।

• 

सुपरमार्केटले एक विज्ञप्ती जारी गर्दै भनेको छ, ‘भाटभटेनीले आफ्ना आउटलेटमार्फत बिक्री हुने हरेक सामानको मूल्य र स्टकको हिसाबकिताब राख्न बारकोड प्रयोग गर्दै आएको छ । तर उक्त लाखमरीको हकमा लकडाउनको अवस्थामा हामीले बारकोडको स्टिकर टाँस्ने जिम्मा सामान आपूर्तिकर्ता काष्ठमाण्डप खाद्य उद्योगलाई नै दिएका थियौं । र उक्त उद्योगले पनि लकडाउनकै कारण सीमित तथा बारकोडको विषयमा गहिरो जानकारी नभएका कर्मचारीबाट काम गराउँदा २५० र ५०० ग्रामको ५० वटा लाखमरी प्याकेटमा एउटै मूल्यको बारकोड स्टिकर टाँसिन गएको हामीलाई जानकारी गराएको छ । र सोही बारकोड हाम्रो बारकोड रिडरले पहिचान गर्दा कम्प्युटर प्रणालीमा बढी मूल्य देखिन गई विभागले हामीलाई जरिवाना गरेको हो ।’

प्राविधिक र कानुनी रुपमा गल्ती स्वीकार गर्दै भाटभटेनीले उपभोक्ता ठग्ने अथवा गलत बाटोबाट पैसा कमाउने नियतले नभएको दावी गरेको छ । विगतमा विनाशकारी भूकम्प र नाकाबन्दीको अप्ठेरो अवस्थामा हामीले आपूर्तिकर्तासँग मोलमोलाइ गर्नुका साथै कम्पनीलाई हुने नाफा कटौती गरेर पनि उपभोक्तालाई साबिकको मूल्यमा सामान उपलब्ध गराएको संझना गराउँदै भाटभटेनीले हरेक आउटलेटमार्फत बिक्री हुने वस्तुहरु अधिकतम खुद्रा बिक्री मूल्य ९एमआरपी० भन्दा कम मूल्यमै पाइने पनि बताएको छ ।

अत्यावश्यक खाद्य सामग्रीहरु बजारको भन्दा कम मूल्यमै स्टोरमार्फत बिक्री भइरहको जानकारी गराउँदै स्टोरहरुबाट बिक्री हुने वस्तुको मूल्यको ग्यारेन्टी दिन तयार रहेको पनि सुपरमार्केटले जनाएको छ ।

गल्ती हाम्रो होः काष्ठमण्ड फुड

यसैवीच काष्ठमण्डप फुडका अनिलदास राजकर्णिकारले बारकोडमा त्रुटी आफ्नै कम्पनीबाट भएको बताएका छन् ।

काष्ठमण्डप खाद्य उद्योगले भाटभटेनी सुपरमार्केटलाई विगत १० वर्षदेखि नेवार समुदायको लोकप्रिय खानेकुरा लाखमरी, तिलको लड्डु, ऐंठे, रोट, पञ्जाफी, अनरसा लगायत सप्लाई गर्दै आएको छ ।

‘बारकोड र मूल्यको स्टिकर टाँस्ने कार्य मूलतः भाटभटेनी आफैंले गर्ने गरे पनि यसपटक लकडाउनको प्रतिकूल अवस्थामा उक्त बारकोडको स्टिकर टाँस्ने जिम्मा हामीलाई दिएको थियो । लकडाउनका कारण हाम्रा अधिकांश कर्मचारी काममा आउन नसकेको र सीमित तथा बारकोडको विषयमा गहिरो जानकारी नभएका कर्मचारीबाट काम गराउँदा २५० र ५०० ग्रामको प्याकेटमा एउटै मूल्यको बारकोड स्टिकर टाँसिन गएको हो,’ उनले भने ।